Ullumikkut Issittup Ullua

Issittup ullua, Naalagaaffiit Peqatigiit silaannaq pillugu ataatsimeersuartitsinerat Montrealimi pisortatigoortumik ippassaq ammarneqartoq ullumi taama qulequtaqartinneqarpoq.

Ilisimatusaatigineqarsimasut assigiinngitsut ullumi saqqummiunneqassapput aammali Canadap issittormiui, soorlu qilaatersornermik torlorsornermillu takutitsissapput eqqumiitsulianillu saqqummersitsissallutik.

Folketingip avatangiisinut pilersaarusiornermullu ataatsimiititaliaa Kuupik Kleistip ilaasortaaffigisaa kiisalu Namminersornerullutik Oqartussani avatangiisinut pisortaq Alfred Jakobsen ataatsimeeqataapput.

Aamma Danmarkip avatangiisinut ministeria Connie Hedegaard aqagumit peqataassaaq. Connie Hedegaard avisimi Politikenimi ullumi saqqummertumi allappoq, Ilulissani pisortatiguunngitsumik aasaq manna ministereqatinilu nunanit allaneersut 21-t isumasioqatigiinnerminni assut sunnertissimallutik ilulissat aakkiartuaartut isigalugit, tamannalu nutaamik eqqarsarnissamut piumassuseqalersitsisimasoq.

Silaannaap kissakkiartornera, immap qaffakkiartornera, panernersuaq, qarsutsinerit silallu sakkortuumik pissusilersornera killilersorneqassappat CO-2-mik aniatitsinerup millisarneqarnissaa ilisimatuut ataatsimeersuarnermi anguniagaraat.