Ullumi ullukinneq nalliussineqarpoq

Decembarip ulluisa 21-anni, ullumi, seqineq sikuiuitsumi avannarlermi kingumut qummut aallassaaq, kingumullu nunarsuup ilaa tamanna

qaammariartoqqilissalluni.

Siulitta ulloq manna taasarsimavaat ullukinnermik imaluuniit aassuutisiorfimmik. Thimothæus Poulsen-ip Sisimiuneersup siulitta ullukinnersiortarnerat atuakkiarpaalussuarni misissorsimavaa, ullukinnerlu pillugu misissuinini pillugu ima oqarpoq:

-Inuiattut naleqartitagut eqqarsaatinniittuartarmata, ullukinneq qangali meeraanitsinniilli tusartagarput itiginerusumik paasiniarlugu atuakkat assigiinngitsut atuaqataartarsimavakka, Thimothæus Poulsen oqarpoq. Paasisimavaa ullukinnersiortarneq nunarput tamakkerlugu qangarsuaaniilli nalliussineqartarsimasoq.

- Siulitsinnit kingornussatta ilagaat ullukinneq, ullormilu tassani seqernup qummut aallaqqinnera nalliuttorsiutigineqartarsimasoq. Taamanilu atisartaartuuttarsimapput, nereqatigiillutik inngerlutillu. Pinngortitarsuup atoruminarsiartuinnaqqinnissaa seqernup uternissaa qilanaarineqartarsimapput. Thimothæus Poulsen oqarpoq ullukinnersiornissamut nerisassanik nalliuttorsiutissanik piliniartoqartarsimasoq, ullukinnersiortarnerlu Aassuutit nuinerannut atatillugu nalliussineqartarsimavoq.

Atuakkat ullukinnersiortarnermik oqaluttuartut soorlu ilaatigut Otto Rosing-ip atuakkiai, Thimothæus Poulsen-ip misissuiffigisimavai.