Ullumikkut ulloq, maajip ulluisa 31-at, tassaavoq nunarsuatsinni peqqinnissakkut suliniaqatigiiffiup, WHO-p, pujortarfiunngitsutut ullorititaa – ”Tupanut qujaannarpunga”- ulloq pujortarfiunngitsoq.
Paarisa-p tamanna, suliffeqarfinnik suliffeqarfimminni pujortarnermik inerteqquteqalerumasunik allanillu Kalaallit Nunaanni pujortartarnerup annikillisinneqarnissaanut suliniuteqarumasunik suleqatigiinnissamik atsioqatigiinnikkut malunnartinniarlugu qinersimavaa.
Kalaallit Nunaanni Kulturikkut Illorsuaq aamma TELE POST Greenland ulloq taanna Paarisamik suleqatiginnissamik isumaqatigiissusiussapput.
Innuttaasut peqqissuunissaannik suliniutip – Inuunerittap – ataani kattuffinnik, peqatigiiffinnik, sullivinnik, immikkut ilisimasalinnik, namminersortunik allanilluunniit peqqinnermik siuarsaanissamut imaluunniit nappatsaaliuinermut aalajangersimasunik suliniuteqarnissamut isumassarsisimasunik suleqatigiinnissaq pillugu atsioqatigiinnissaq periarfissaavoq.
Tamatumalu saniatigut ullumikkut ullormi pujortarfiunngitsumi ”suleqatigiinnissamik” kinaluunniit imminut isumaqatigiissuteqarsinnaavoq – ullumikkuinnarluunniit…
