Ullumi ulloq mitaarfik

Juullip ullui naggaserlugit igalaami ullorissat kiisalu pinnersaatit juullerpalaartut ullumi kunngit pingasut ulluanni piiarneqassapput. Illoqarfiit nunaqarfiillu ilaanni ulloq manna aamma mitaarfiusarpoq.
Allattoq Oline I. Olsen
januaarip 07-at 2010 07:55

Assitoqqat arktisk instituttemeersut takutippaat Ilulissani nakorsaq Bendtzen mitaartunit 1904-mi pulaarneqartoq. Mitaartut illoqarfiit nunaqarfiillu ilaanni kunngit pingasut ulluanni ulloq manna tikillugu suli takuneqarsinnaasarput. Soorlu Upernavimmi mitaartut illunut pulaartarput tukkataarlutik qitittarlutik, iserfiisalu najoqqaasillugit kaffisortittarpaat tuniorarlugillu.

Tunumi Tasiilami nunaqarfiinilu mitaartut illuniit illunut ullaarnganiit pulaaqattaartarput, katersortarfinnilu unnukkut qilaatersorlutik unammiuaartarput, ajugaasullu pingasut akissarsisinneqartarlutik.

Ilulissani ukiortaamiit kunngit pingasut ulluata tungaanut mitaartoqartarpoq. Mitaartut illunut iserlutik qitittarput aammali aqqusinermi aliikkutarineqartaqaat. Mitaartullu imminnut ilisaritinnaveersaartarput, kinaassusertik paasitinnaveersaarlugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq