Ullumi ulloq Issittut Ukiuisa ulloraat
Issittup ukiuinut atatillugu suliniutinut ulloq ilaavoq. Taamaalilluni ullormik taamaattumik arfinilissaa ulloqartitsisoqarpoq, taamaattorli inuit issittumi najugallit immikkut sammineqarnerat aatsaat siullerpaamik ingerlanneqarluni.
Tamannalu nalaatsornerinnaanngitsoq Issittut Ukiuinut allaffeqarfik nittartakkamini allappoq.
Maannami issittumi najugallit sammineqartorujussuummata.
- Silap pissusaata allanngoriartornerata inuit inuuniarnerat allanngortippaa, soorluttaaq issittumi najugallit massakkut aningaasarsiornikkut inooqatigiinnikkullu imaannaanngitsunik unammilligassaqartut, allaffeqarfik naliliivoq.
Nunarsuarmi sumiiffinni arlalinni ulloq malunnartinniarneqarpoq, ilaatigut Canadami nunat inoqqaavisa radiuata CKLB-p nunarsuarmiut sumi tamaaniittut internetradiukkut attaveqqatigiissinniarpai. Tamanna pissaaq nittartakkami www.ncsnwt.com-imi.