Ullumi ulloq ajunngitsuliorfissaq

Nelson Mandela ullumikkut 92-inik ukioqalerluni nalliuppoq. Ullumikkut ulloq ajunngitsunik iliuuseqarnernut atorneqassaaq, Nelson Mandela oqarpoq.
Allattoq Jaaku Lyberth
juulip 18-at 2010 14:24

Ajunngitsumik iliuuseqarneq Sydfrikap præsidentiata Sydafrikamilu naalakkersuisut ANC-ip partiiani ilaasortaasut malunnartissavaat, Nelson Mandelap inunngorfigisaani Mvezo-mi peqqissaviup naammassineqarnissaanik suleqataanermikkut.

Suliffeqarfiit pisortallu suliffeqarfii ullumi ullormi malunnartitsiniaanernik pilersaaruteqarput.

Minutsini 67-ini meeqqat meeqqat angerlarsimaffiini najugaqartut atuffanneqassapput, inuit aneerasaartarfiini pisortat pigisaanni saliineqassaaq, atuarfiillu illutai qalipanneqassallutik.

Minutsit 67-it ullumi atorneqarnissaannut pissutaatinneqarpoq, Nelson Mandela ukiuni 67-ini naalakkersuinermik suliaqarsimammat.

Nelson Mandela illoqarfissuarmi Johannesburg-imi ilaquttani peqatigalugit inuuissiornini malunnartissavaa. Meeqqat 100-it missaannik amerlassuseqartut, Nelson Mandelap inunngorfigisaani Mvezo-mi najugaqartut timmisartumut ilaatillugit Johannesburgiliartinneqarput, inuuissiortoq nallittorsioqatigiartorlugu.

Ullumikkut ulloq Nelson Mandelap ullorissagaa Naalagaaffiit Peqatigiit nalunaarutiginikuuaat, Danmarks Radiup nittartagaa taama allaaserisaqarpoq.

Nelson Mandelap nalliunnerani KNR-ip atuartartut tamaaasa ullormi ajunngitsunik iliuuseqarnissaanik kissaakkumavai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq