Ullumi Nuummi uumasunik nuisitsisoqassaaq

Nuummiut siullerpaamik misigisussanngorpaat uumasunik nuisitsineq. Tamanna Danmarkimi ukiut 100-ut sinnerlugit atorneqarpoq uumasut piaqqiortitat nersussuit, histit savallu nuisinneqartarmata. Nuummili sapaammi nalunaaqutaq quliniit sisamap qeqqata tungaanut uumasut allat nuisinneqassapput.
Allattoq Noah Mølgaard
aggustip 19-at 2012 06:37

Uumasunik nuisitsineq pissaaq Dyrenes Husimi Nuukullak 34-imi taassumalu eqqaani qatserisartut sungiusartarfianni. Tassani uumasut 50-it nuisinneqassapput. Tassaapput qitsuit, marsvinit, hamsterit allallu uumasut anginngitsut takusaasullu taasinermikkut toqqaaqataaffigisinnaassavaat uumasoq sorleq takorannernerunersoq.

- Sapaammi uumasut nuisinnerisa saniatigut pisussarpassuaqarpoq. Ilaatigut agility bane sananeqarpoq tassani inuit qimmitik nassarsinnaavaat tassani ingerlaffissiami uumasut piginnaasaat misiligarneqarsinnaammata. Taakku saniatigut sikoqassaaq, safteqarluni, pølseqarluni, candyflosseqarluni popcorneqarlunilu. Taamaasillutik uumasunik nuisitsinermut takusaasut qanerissaasersinnaapput, aaqqissueqataasoq Harry Holm oqarpoq.

Sapaammi aallartinnissaq sioqqullugu toqqit saqqummersitsiviillu suliarineqassapput takusaasut siulliit takkutinnginneranni.

- Assut nuannaarutigaarput Poul Thomsen peqatigalugu ammaasinnaagatta taannalu uumasunik nuannarinnittutut ilisimaneqarpoq. Taanna ukiorpassuarni Danmarks Radiomi uumasut pillugit aallakaatitassiortartutut ilisimaneqarpoq. Taanna nalorsitsaariniarpoq tassungalu ilaqutariit sisamat nalunaarsimapput. Taava marlukkaarlutik unammissapput ajugaasussarsinissamik tungaanut. Taakkut saniatigut ilanngaaserisut qimmii piginnaasaminnik takutitsissapput. Neriuppugut Nuummiut aggialluarumaartut. Taama pisoqarpat una ukiut tamaasa uteqqiattutut pisalissaaq, Harry Holm oqarpoq silaginnissaanillu inniminniisimanerarpoq.

Uumasunik nuisitsineq pillugu atuarsinnaavutit uani: http://dyrenesvenner.gl/nuuk-dyrskue-2012