Ullumi corona pillugu kisitsisit: Tunillatsittut nutaat 26-t
Annertuumik tunilaassuisoq Nuummi aaqqissuussisoqarnerani peqataasimavoq.
Tamanna nakorsaaneqarfiup ullumi paasivaa.
Tassami tunillatsissimasut nutaat 26-t nassaarineqarsimapput.
Ilulissani tunillatsissimasut nutaat marluk, Aasianni ataaseq, Sisimiuni tallimat, Nuummi 17-it kisialu Qaqortumi ataaseq nassaarineqarput. Taakkunannga amerlanerit Nuummi aaqqissuinermi tunillatsissimapput.
Nakorsaaneqarfik naapertorlugu, aaqqissuinermi pineqartumi peqataasut tamarmik akiuussutissamik kapitereernikuupput. Aaqqissuinermi peqataasut Nunatsinni sumiiffinniit assigiinngitsuneersuupput.
Tassunga peqataasut nappaat illoqarfimmut najugaqarfimminnut anngussimavaat.
Taakkua ilaat Danmark-imiit tikinnermi kingorna aamma tunillatsissimasoq nassaarineqarpoq, taamaammat nakorsaaneqarfimmit innersuussutigineqarpoq, Nuummiit Kangerlussuarmut tallimanngornermi 22. oktobari GL 542-mut ilaasimasut misissortinnissaat, nappaatillu sunniutigisartagai eqqumaffigineqaqqullugit.
- Nuummi Sisimiunilu suli inuiaqatigiit akornanni tuniluuttuoqarpoq, nappaatillu sunniutigisartagaanik malussartut tamarmik mattusimaaqquneqarlutillu misilitseqquneqarput.
Ulluni kingullerni tunillatsissimasut amerliartoraluartut, tunillatsittartut ikiliartorput. Kalaallit Nunaanni ippassaq tunillatsittut 93-iusut ullumi 81-iupput.
Tunillatsissimasut kommunikkaarlugit agguataarneri ima isikkoqarput:
Avannaata Kommunia: 3
Kommune Qeqertalik: 1
Qeqqata Kommunia: 21
Kommuneqarfik Sermersooq: 55
Kommune Kujalleq: 1
