Ullumi aallartissapput
Nunarsuatsinni sisoraatinik oqilaniuunnerit sakkortunersaasa ilagigunagaat, Arctic Circle Race, Sisimiuni ullumi ullaap tungaa nalunaaqutaq qulinut aallartissaaq, peqataasut nunanit allamiut siornamut naleqqiullugu amerlanerullutik peqataassallutik.
- Nunatta avataaneersut peqataasut malunnaateqarluartumik siornamut naleqqiullugu amerlanerupput 50 procenti angullugu amerlanerullutik, Arctic Circle Race-mi siulersuisut siulittaasuat, Jens Klaus Lennert taama oqarpoq.
Nunanit 15-nit peqataasut sisoraatinik oqilaniunnersuarmi, ulluni pingasuni sivisussuseqartussami, katillutikl 139-it ullaap tungaa qulinut aallakaassapput.
Ingerlaarfissaallu piareersarneqarluni aaqqissuussisunit suli ulapputigineqarpoq.
- Ulapputtunnguaqarpoq. Peqataasut camp-eqarfissaat, tassa tupeqarfissaat ippassaq ulloq kingulleq atorlugu piareersarneqarpoq kusassarneqarlunilu, Jens Klaus Lennert oqarpoq.
Ukioq manna nunarput isseqaaq, ullunili kingullerni issaasannerulerluni. Arctic Circle Race-mili peqataasussat ingerlaarfissaat aputeqarluarpoq.
- Illoqarfik aputeqarluarpoq nunalli timaa aputikinnerulluni, kisianni ingerlaarfissaat ajorani, Jens Klaus Lennert taama oqarpoq.
Siorna 2011-mi, Arctic Circle Race-mi arnani ajugaavoq Nunatsinneersoq, Niviaq Chemnitz Berthelsen ukioq manna aamma peqataassaaq, angutini siorna ajugaasuulluni russeq, Ilya Chernousov, taannali ukioq manna peqataanani.
Ukioq manna Arctic Circle Race-mi peqataasut nukarlersaraat 13-inik ukiulik, Laarseeraq Euginius Nunatsinneersoq, utoqqaanersaalluni unammeqataasussaq 67-inik ukiulik, Jørn Breinholt aamma Nunatsinneersoq.
