Ullukinnersiorneq: Ukiup taarnerpaaffia qaammariartorneranik taarteqarpoq

Ullumi ulloq decembarip 21-at tassaavoq ullukinneq. Tamanna ukiup ingerlanerni ullup naannerpaaffianik taarnerpaaffianillu isumaqarpoq.

Ullorli aamma tassaavoq ullukinnersiorfik, ukiup allanngorfiani aamma ullut qaamanerulernerani ullortusiartorneranilu persuarsiorfiusoq.  

Ullorissat ullortunerulerneranik takutitsisut

Qanga kalaallit siulitta siunissami pisussat paasiniarlugit qilammut qiviartarput.   

Tassami ullorissat Aassuutit ullukinnermi nuisarput, ullortunerulerneranillu nalunaartutut qanga taaneqartarlutik. Aassuutit tassaapput ullorissat marluk, taaguuteqartut Altair aamma Tarazed.   

- Taakku ullorissat marluk ullumikkut nuisut qanga nuigaangata seqineq pukkinnerpaaffissaminut pisoq siulitta paasisarpaat aqaguanilu ullut qaammariartuinnalissasut paasisarlugu. Piniarnerinnarmimmi aalisarnerinnarmillu inuuniuteqaraanni qaamaneq pingaaruteqaqaaq, qilaatersortartoq Tukummeq Qaavigaq oqarpoq.

Taakku ullorissat marluk seqineq qummut aallarteqqittaraat, malitsigisaanillu qaamanertusiartulerneranik nalunaartuusut kalaallit oqaluttuaanni taaneqartarput.  

Qanga siulitta persuarsiorfiat

- Ulloq siulitta pingaartuutillugulu persuarsiorfigisarpaat, tassami aqaguaniit ullut qaamanerujartuinnalertussaammata, Tukummeq Qaavigaq ullukkinneq pillugu oqaluttuarpoq.

Siulitta Aassuutisiorfik nalliussigaangamikku nerilluarlutik, tunioraallutik, nuannallutik qittallutillu persuarsiortarsimapput.   

- Aasakkut ukiakkullu uumasut assigiinngitsut pisat piliarineqaraangata ilaat peqqumaatigineqartarput. Neqit pitsaanerpaartaat ullormi tassani pilluaatigineqartarput. Ammit ukiap ingerlanerani atisaliarineqarsimasut ullukkinnersiornermi atisartaarineqartarput. Ataatsimoorluni nerisoqartarpoq qilaatersorluni aamma oqaluttuaqattaalluni aliikkusersoqatigiittoqartarluni, taanna Tukummeq Qaavigaq oqarpoq.  

AAMMA ATUARUK Vintersolhverv blev fejret i Qaqortoq

Ullukinnersionermut atatillugu Tukummeq Qaavigaq avanersuarmiutut assuarluni qaqortunik takisuunik kameqarpoq, teriannissap amianik takisoqarluni puisillu amianik amaateqarluni. Amaammi meeraq amaarneqartarpoq.  

Taassuma ullukinnersiorneq malunnartinniarlugu ukiut tamaasa qullermik orsutortumik ikitsisarpoq qilaatersorlunilu.

Tukummeq Qaavigaq ullukinnersioqatigiuk

• Nal. 16-miit 17.30-ip tungaanut Nuummi Katuami qullermik orsutortumik ikitsissaaq qilaatersorlunilu.
• Nal. 18 Nuummi Inuk Hostelsimi qullermik orsutortumik ikitsissaaq