Ullrich aamma Sevilla tunuartitaapput
Tour de France aqagu arfininngornermi juulip ulluisa aallaqaataanni aallartittussaavoq, pissangallutillu utaqqisortappassuugunarput, nuannerpallaanngitsumilli pisoqarpoq.
Tassa peqataasussani immaqa qilanaarineqarlunilu pissanngatigineqarnerpaaq, Jan Ullrich, holdeqataalu. Oscar Sevilla, tyskit sikkilertartut holdianniit, Tele-mobilimiit, ingerlaannartumik atuutilersumik tunuartinneqarput.
Tamatumunnga pissutaanerarneqarpoq sikkilillammassuit taakku marluk Spaniami sukasaasersimasut paasineqarsimasoq oqallisaalersimammat.
Tyskit sikkilertartut holdii Tour de France-p aallartinngilaattaani taama tassa nalunaarput.
Jan Ullrichip nunarsuarmi sikkilernerit annertunersaanni ajugaanissaa ilimagineqarluinnaraluarpoq.
Jan Ullrichip nammineq immikkut sungiusaasua Tele-mobilimit aamma tunuartinneqarpoq.
Jan Ullrich sukasaasersimasunut ilumut ilaasimanersoq, taamaassimappallu qanoq annertutigisumik, suli ilisimaneqanngilaq.
