Ullorsiorfik nutaaq
Tassami Naalagaaffiit Peqatigiit taasinermi akerliusoqaratik novembarip 19-iat nunarsuaq tamakkerlugu "anartarfiit ullorissagaat" ippassaani aalajangiuppaat. Peqqissutsimut ajornartorsiutip maluginiarneqarneq ajortup isiginiarneqarnerulernissaa matumani siunertaavoq.
Anartarfiit nunarsuaq tamakkerlugu ulloqartinneqalernissaat quiagineqassasoq quiassuaatigineqassasorlu, Naalagaaffiit Peqatigiit nalunngereerpaat.
- Illaatigineqarnissaa aamma ajunngilaq, tamanna nunarsuarmi peqqinnissamut anartarfeqarnermullu ajornartorsiutit pillugit ammasumik pimoorussillunilu oqallinnissamut ajoqutaassanngikkuni ajornavianngilaq, Naalagaaffiit Peqatigiit Singapore-mi allartitaat Mark Neo siunnersuuteqartuusoq oqarpoq.
Taassuma erseqqissarpaa, nunarsuarmi inuit 2,5 milliardit peqqissuunissamut tunngasunik isumagineqarpianngitsut - aamma nunarsuarmi inuit 1,1 milliardiusut taamaallaat silami perusuersartarmata.
Nunarsuarmiut tamarmik anartarfeqaleraluarpata meeqqat ukiut tamaasa 200.000-init amerlanerusut annaanneqarsinnaassagaluartut, Naalagaaffinnit Peqatigiinnit oqaatigineqarpoq.
Singaporemit suliniutigineqartoq Naalagaaffiit Peqatigiit ilassilluarpaat, qullersammi tulliata Svenskiusup Jan Eliassonip isumassarsiaq nersualaarpaa.
- Peqqinnissamut tunngasunik iluamik isumagineqarneq iluamik naleqartutut isigineqarnermut tunngaviuvoq, Jan Eliasson oqarpoq.
Taama ulloqartitsineq Nunatsinni immaqa aamma atorluarneqarsinnaassagaluarpoq, inuppassuimmi kuutseriaannarnik suli anartarfeqanngimmata.
"Nunarsuaq tamakkerlugu anartarfiit ulluat" nunarsuaq tamakkerlugu marlunngornermi novembarip 19-ianni ukiormanna siullermeersumik atuutsinneqassaaq.