AWG2016 Ullormut pisussat

Arctic Winter Gamesip ullut sisamassaanni unammisut amerlanersaat pissartanngorniutivinnernut anngutilerput.
marsip 10-at 2016 06:52
Nutserisoq Mads Lynge

Soorlu sulorarnermi. Kalaallit Nunaatami unammissutini assigiinngitsuni finalimut anngunnissaa ilimagisaavoq, soorlu nukappiaqqqat niviarsiaqqallu iligiikkuutaarlutik double-imi unammineranni.

Sulorarnermi pissartanngorniutivinnerit KNR-TV-kkut toqqaannartumik malinnaavigineqarsinnaapput, Inussivimmit ualeru nalunaaqutaq marluniit aallakaatitsisoqalissagami.

Nukappiaqqat niviarsiaqqallu sulorarnermi iligiikkuutaarlutik mixed double-imi semifinalernerat KNR Radiokkut ullaap tungaani malinnaavigineqarsinnaassapput, soorlu aamma nerrivimmi arsaararnermi semifinalit aallakaatinneqassasut. Volleyballertut KNR-TV-kkut nalunaaqutaq qulingiluaniit ulloqeqqata tungaanut aamma aallakaatinneqassapput.

Naggueqatigiillu Inuit pinnguaataanni Inuit aamma Dene Gamesimi noqqoruunnermi "fingerpull"-imi unammisoqassaaq.

Arctic Winter Games 2016-imi nunat assigiinngitsut maannamut ujaminnaattaavisa allattorsimaffiat alakkaraanni takuneqarsinnaavoq Kalaallit Nunaat normu 4-tut inissisimasoq maannamut 29-nik ujaminnalluni, taakkunannga kuultit 13-it.

Alaska maannamut ujaminnannerpaavoq 110-nik ujaminnakkami, taakkunannga kuultinik 38-nik.

Yukon tulliuppoq 59-inik ujaminnassimagam. Alberta North normu 4-tut inissisimavoq 37-nik maannamut ujaminnakkami, taakkunannga kuultit 15-it.