Ullormut kulturisiorfimmut 800.000 koruunit atorneqarput
Kulturimut sammisaqartut 2007-imi akerliussutsimik takutitsinerisa kingorna ullormik kulturisiorfeqartalernissaa naalakkersuisut siuliinit aalajangerneqarpoq, ukiormannalu ukiup aappassaa malunnartinneqarpoq.
Ulloq kulturisiorfik malunnartinniarlugu aaqqissuussinernut aningaasaliissutit 800.000 koruunit kommuninut sisamanut Naalakkersuisunit agguaanneqarput.
Kommuneqarfik Sermersuumi ulloq kulturisiorfik sapaatip akunnerata naanerani malunnartinneqarpoq, ilaatigut ilaqutariikkaarluni arpannermik unammisoqarpoq, qaannamik unammiuaartitsisoqarluni, puisinnanniutsitsisoqarluni, atisanik takutitsisoqarluni, qititsitsisoqarluni taavalu kalaallisuunik kusanarneqqusaatsitsisoqarluni.
Kultureqarnermut naalakkersuisoq Mimi Karlsen isumaqarpoq ullut tamarmik kulturisiorfiusariaqaraluartut.
- Kulturikkut tunuliaquarput aallaavigalugu kulturikkut kingornussatta kinguaariit tulliannut ingerlateqqinnissaat eqqumaffigisariaqarparput, kikkunnut tamanut nuannaarutaasumik.
