Ullormut kaffisulaartarneq imminornermik pinaveersaartitsisinnaavoq
Misissuinerup nutaap takutippaa, ullormut marloriarluni kaffisornikkut angutit arnallu imminornissamik eqqarsaateqartarnerinik 50 %-imik appartitsisinnaasoq, nutaarsiassaqartitsivik upi.com taama allappoq.
Misissuineq Harvardimi innuttaasut peqqissusaannik ilisimatusarfimmi Inuussutissanut immikkoortortaqarfimmi ingerlanneqarsimavoq. Ilisimatuut misissuinerat Amerikami misissuinernik pingasunik toqqammaveqarpoq, angutillu 43.599-it arnallu 73.820-t misissuinerit aallaavigineqarlutik.
Misissuinermi paasineqarpoq inersimasut ullormut marloriarlutik sisamariarlutilluunniit kaffisortartut koffeinitaqanngitsumik kaffisortartunut imaluunniit kaffisorneq ajortunut naleqqiullugit imminortarnerat 50 %-imik apparsimasoq.
Koffein qaratsamut qiteqqamullu uummarissaataasarpoq, aammali nikalloqqajaanaveersaataalluni sakkukitsoq, qaratsap neuro-transmitteriliorneranik, soorlu serotoniniliorneranik, dopaminiliorneranik noradrealiniliorneranillu annertusaasarmat.
Ilisimatuulli misissuinermik ingerlatsisuusut inersimasut nikalloqqajaasut isumatsattartullu koffeinitornerulernissaannik kaammattuutigerusunngilaat, tamanna nuanninngitsunik sunniuteqarsinnaammat.
- Misissuinerup inerneri ataatsimut isigalugit, ullormut marloriarluni pingasoriarluniluunniit kaffisortaraanni - koffeinip 400 milligrammit annertoqataanik - annikitsuinnarmik sunniuteqarsinnaavoq, ilisimatuut nalunaarusiaminni taama allapput.
