Ulloriarsuarmi Mars-imi uumassuseqartoqarnersoq misissorneqalerpoq

Ulloriarsuarmi Marsimi uumassuseqartoqarnersoq uumassuseqartoqannginnersorluunniit misissorneqaqqittussanngorpoq, tassa Amerikamiut unnuaru Marsimut misissuiartortitartik Phenix aallartittussanngormassuk. Misissuiartortitaq Marsip “qalasersuanut” avannarlermut nunnittussaavoq. Taamatut misissuiartortitsineq sooq soqutiginarnersoq Michael Linden Wørnlev-ip Thyco Brahe Planetariameersup ima nassuiarpaa:

Marsip “qalasersua” avannarleq ulloriarsuup sinneranut naleqqiullugu maninneruvoq. Tamaani qangarsuaq imarpeqarsimasinnaanera ilimagineqarpoq. Tassa imaassinnaavoq misissuiartortitaq Phenix imarpissuusimasumut maanna serminnguussimasumut nunnittoq. Taamaattoqarnersoq ilaatigut misissorneqassaaq, tassa Marsimi silaannaap allanngoriartorneri qanoq ittut atuussimanerat misissorniarneqarmat.

Phenix robotimik usisussaavoq Marsimi assaalluni misissuisussamik.

Roboti Marsip qaavaniit ammut 50 centimeterinik itissusilimmut assaasussaavoq. Tassa roboti Marsip qaavaniit itinerulaartumiillu misissugassanik katersisussaavoq. Marsip qaava soqarnersoq misissorusunneqarpoq, sermeqarnersoq, atortussiassaqarnersoq, inuussutissartaqarnersoq aamma allanik sananeqaateqarnersoq misissorniarneqarpoq. Apeqqut pingaarutilik tassaagami tamaani uumassuseqartoqarsimagaluarpa? Naak misissuiartortitaq uumassuseqartoqarneranik ujaasisinnaanngikkaluarluni uumassuseqartoqarsimasinnaaneranik misissugassanik katersisinnaavoq.

Taamaattorli Marsimi uumassuseqartoqarnersoq maannakkut misissuinermi paasineqarnavianngilaq. Taamaallaat iluatsitsinikkut tamanna paasineqarsinnaasoq oqaatigineqarpoq. Aatsaammi 2009-mi uumassuseqartoqarneranik immikkut misissuiartortitamik silaannarsualiartaammik aallartitsisoqartussaavoq. Taamaattumik apeqqutip tamatuma akinissaa utaqqisariaqassagipput Michael Linden Wørnlev oqarpoq.