Ulloqeqqanut qinersineq

Sineriammi kommunalbestyrelsenut ullumi apriilip tallimanni qinersineq aallarteruttorpoq, Nuummi qinersineq ullaaq qulingiluanut ammaneqarpoq.

Kommunalbestyrelsimut kingullermik qinersinermi qinersisartut katillugit 38.000-t missaaniissimapput, Nuummi ukioq manna qinersisussat 10.316-nik amerlassusseqarput.

Nuummi qinersisitsisoq Franklin Høegh Olsen oqarpoq kingullermik kommunalbestyrelsemut qinersinermut sanilliullugu qinersiartortut amerlanerusut, 2001-mi qinersinermi 12,15 %-t ulloqeqqanut qinersiartorsimapput, ullumilu qinersiartortut amerlanerupput, 13,12 %-t qinersiartorsimammata. Nuup nunaqarfiini aamma qinersiartortoqarluarsimavoq. Kisitsitsillu assigiinngitsut naatsorsuutigalugit, silaginneralu naatsorsuutigissagaanni ullup sinnerani qinersiartortoqarluassasoq Nuummi qinersisitsisup ilimagaa. Sumik patsiseqarsimagaluarnersoq Nuummi qinersisitsisup inatsisartunut qinersinerni qinersisartut amerlanerusartut paasisimavaa. Nuummi qinersisartut pittorluttullu qinersivimmukarniartut Nuup Bussiinik rute 10-mit rute 20-imillu qinersivimmut assartorneqassapput.

Nuup qinersivianit Upernaviup qinersivianut nuulaariarta. Tassani suleqaterput Janus Maqe oqaluttuarpoq Upernavimmi ullup qeqqanut folketingimi qinersinermut sanilliullugu amerlanerullutik 19,36 %-t qinersiartorsimasut. Janus Maqep maluginiarpaa Upernavimmi qinersivimmut isernialeraanni IA-p Siumup Atassullu erfalasui akulloqquteqqaartariaqartut.

Qaqortumi qinersiartorneq pillugu suleqatitta Jørgen Semionsenip nalunaarutigaa Qaqortumi silagissimaqinermat qinersiartortut kingullermik qinersinermut naleqqqiullugu ikinnerusimasut, qinersisitsisorlu Kim Dahl oqarpoq 24,15 %-t ulloqeqqarnerani qinersiartorsimasut.

Qinersinermut sukumiinerusumik malinnaarusuttoqarpat, taava nittartakkatigut malinnasoqarsinnaavoq uunga iserluni:

www.Qinersineq.gl