Ulloqartitsisarneq taamaatiinnarneqarpoq
Islandimi Savalimmiunilu Takornariaqarnermi Siunnersuisoqatigiit Illu Atlantikumi allaffeqarfiisa matuneqarnerat tamatumunnga pissutaavoq.
Nunat Atlantikup Avannaamiut suleqatigiillutik aaqqissuussisaraluarput, kisianni siornali ulloqartitsisoqarsimanngilaq, tassami Nunatsinni Takornariaqarnermi Inuussutissarsiornermilu Siunnersuisoqatigiit Illu Atlantikullu marluinnaallutik pilersaarusiorluakkamik aaqqissuussisinnaanatik isumaqarmata. Illu Atlantikumi avammut paasissutissiisartut pisortaat, Martin Hilker, taama ilisimatitsivoq.
Uniinnartoqartariaqanngilarli - tassami Illu Atlantikumi Kalaallit Nunaat pillugu ukioq-manna ulloqartitsisoqassaaq. Takornariartitseqatigiiffik Culture Adventure Illu Atlantikumi Issittup Illuanik taaneqartartumiit Kalaallit Nunaannut tunngasunik arfininngorpat aaqqissuussiniarpoq.
Københavnimi Ikerasanni qajartornissaq, qalipaasup sulliviani meeqqanik qalipaatitsisoqarnissaq, Kalaallit Nunaanni illoqarfikkoortuusaarluni Christianshavnimi pisuttuarnissaq oqalugiarnissarlu ilaatigut pilersaarutaapput. Umimmaap neqaanik kebabilianik ussigassaqassaaq, kalaaliminersisoqarsinnaassalluni, takornariartitseqatigiiffiullu Culture Adventurep Kalaallit Nunaannut angalasarnini ussassaarutigissavai.
Culture Adventurep aaqqissuussiniarnera Illu Atlantikumiit nuannaarutigineqartoq, avammut paasissutissiisartoq Martin Hilker oqarpoq.
Aaqqissuussinermik takuniaasut illu Atlantikumut ulloq taanna aamma alakkaasinnaapput, savalimmiormiut nuersaariaasiat pillugu tassani oqalugiartoqassammat. Tallimaasartut Polar-Kvintetten, jazzerpalaartumik saxofonertartoq, Benjamin Koppel, peqatigalugu issittumi ilisimasassarsiorluni peqataasarsimasunut nersorinninniutinik atuillutik unnukkut aamma nipilersussapput.
