Ulloq unnuarlu Nuuk allanngorluinnaraluarmat

Suut tamarmik aallartipput pingasunngornermi unnukkut USAp nunanut allanut ministeria Hillary Clinton Nuup mittarfianut mimmat US Air Forcep timmisartuanut ilaalluni, sillimaniarnermi paarsisut seqinersiutinik isaruallit illuinnarsuutilisartullu ungalullugu paarsisut, taamaasiornerminnilu oqaluuteeqqaminni malunnanngitsumik inissitani oqaluttuarput.

Biilinik pigittut aamma arlallit paasinnguarujaat imaannaanngitsumik tikeraartoqartoq. Qimmit qaartartunik ujaasisartut biilit motooriisa qaavannut pillutik narajortarput timmisartup minnissaata akuerineqannginnerani.

Kulturip illorsua Katuaq nunarsuarmi sumiikkaluartumiluunniit mittarfiit ilaata isaariaanut eqqaanarneruvoq politiit sillimaniarnermilu paarsisut taskit, kavaajat timillu attorlugit misissoqqissaartarmatigit isernissamut akuersinnginnerminni. Ilaallu pujortaguummerlutik anerusuummersimassagunik iseqqinialeraangamik aamma taamatut misissorteqqaarlutik isertarput.

Katuap eqqaa tamarmi assersorneqarsimavoq Namminersorlutik Oqartussat illorsuata eqqaaniik Kuussuarmi pisuinnaat ikaartarfiata tungaanut, assiaqutsit ungataanniit alapernaasersut takuinnarsinnaavaat Ruslandip USAllu nunanut allanut ministerii tikikkaangata qanoq upalungaarsimaneq annertutigisartoq.

Nuummilumi innuttaasut maluginngitsoorsinnaasanngilaat Clinton qanilliartuleraangat politiit paarsisullu unngussimasarmassuk. Aammalumi pisuttualaarniarluni aalajangerpoq Katuami ataatsimiinneq naammassimmat silaannarik nillataartoq najuussulaarusunnguatsiarlugu, tikeraarneralu ilisimatusarfimmi Ilimmarfimmi naammassivoq – aamma paarsisunit unngusimaneqarluni.

Tallimanngorneq naliginnaasoq ullaaq manna Nuummiut iterfigaat. Aqquserngit sanerluarneqarsimapput, erfalasulli peerneqarsimapput tikeraarpassuillu illoqarfimmi takussaajunnaarsimallutik.

ASSIT TAKUKKIT: /da/billedgalleri-arktisk-r%C3%A5d