Ulloq unnuarlu angerlarsimaffinnut utaqqisut allattorsimaffiat kinguartooqqavoq

Tallimanngormat Radioaviisimi ilanngutassiarivarput, ulloq unnuarlu angerlarsimaffinnut utaqqisut allattorsimaffiat kinguaatooqqasoq, Namminersornerullutik Oqartussani napparsimasoqarnera inatsisartullu ataatsimiilernerat peqqutigalugit.

Ilaqutariinnermut naalakkersuisunngorlaap, Aleqa Hammond-ip, Itisiliinermut kinguartoorneq ajuusaarutigaa neriorsuutigaluguli suliaq ingerlanneqalissasoq:

-Kommunininngaanniit nalunaarfigineqarnissarput nalunaarugisimavarput. Tassa taakkuninnga suliaqartut pitsaanerpaamik oqarfigisinnaavaatigut. Nalunngilarput kisitsisit annertuallaarujussuartoq, taamaattumik naalakkersuisooqatigiit immikkut isumaqatigiissuteqarfigivaat meeqqanut sumiginnakkanut tunngatillugu immikkut suliniuteqarnissaq. Nalunngilarput amerlavallaartut aamma taanna aallaavissaareerpoq, immikkut iliuuseqarnissamut tunngatillugu, Aleqa Hammond oqarpoq.

Aleqa Hammond-ip pingaartilluinnarlugu oqaatigaa aningaasat pissarititaasut killeqarneri peqqutigalugit massakkut pinngitsoorani paasisariaqartoq pissarititaasut qanoq annertutiginersut, tamannalu suliaq aamma ingerlasoq.

-Taava qulakkiissavarput nunatsinni suleriusissaq sumi annertunerunersoq sumilu annikinnerussanersoq. Taassuma saniatigut aamma paasiniarpara ukiup qanoq ilinerani aalajangersimasumik suliat tamakkua saqqummertarnersut, allannguuteqartarnersullu. Taamaalilluni peqqutai aammalu sooq meeqqat taama annertutigisumik sumiginnarneqarnersut paaserusukkakku. Taassuma saniatigut pinaveersaartitsineq annertunerusoq suliaqarfigerusukkakku, ilaqutariillu taakku meeqqaminnik sumiginnaasuusut, sumiginnaasarnerallu annertusiartortillugu suliniuteqarfigiumavara pinaveersaartitsineq paasititsiniaanerlu annertooq, ilaqutariinnullu taakkununnga tapersiinissaq aamma angorusukkakku, Aleqa Hammond oqarpoq.

Itisiliinermik tusarnaanngitsoortut knr-ip nittartagaatigut tusarnarsinnaavaat, uani knr naggat gl titarneq uingasoq Itisiliineq alakkarlugu.