Ulloq akissarsiffik sumiiffiit amerlanersaanni eqqissisimasumik ingerlasoq
Politiit Meeqqallu illersuisuat ataatsimoorlutik ataasinngormat oqaaseqaateqarput. Qaammatip naanerani akissarsiffimmut atatillugu meeqqat qanoq innerat sianigeqqullugu innuttaasunut kaammattuuteqarput.
Taamatullu kaammattuuteqarnerat tusaaniarneqarsimagunarpoq. Qaqortumi, Maniitsumi, Upernavimmi Paamiunilu politiit KNR-ip attaveqarfigai. Marlunngornerup unnukkua ajornartorsiuteqarfiuvallaarani ingerlasimasoq politeeqarfinnit oqaatigineqarpoq.
- Maannamut eqqissisimasumik ingerlavoq. Taamaaginnarnissaa neriuutigaarput, Qaqortumi poliiit ningiorigallagaat Laila Fleischer taama oqarpoq.
Illoqarfiilli pingaarnersaanni politiit allaanerusumik misigisaqarput. Akissarsiffiummi kingorna pingasunngornermi unnukkut ulapinnerusimapput, piareersimasut ittuat Knud Frederiksen taama oqarpoq.
- Marlunngornerunera eqqarsaatigissagaanni ulapinneruvugut.
Aalakoortilluni biilernerit marluk, nakuusernerit marluk, biilimik aallarussineq ataaseq, pisiniarfimmi tillinniarneq ataaseq angerlarsimaffimmi eqqissiviilliornerit Nuummi politiit pingasunngormat orniguffigisimavaat.