Ulloq 12.12.12 aamma illit katissavit?
Ulloqanngilaq taaguutilimmik 13.13.2013, taamaammat ukiut 88-it qaangiuppata, januaarip ulluisa aallaqqaataanni, 01.01. 2101, periarfissaq taamaattoq aatsaat takkuteqqittussaavoq taamanikkut ulloq naalisarneqarsinnaassammat 01.01.01-mut.
Danmarkimi ukioq-manna ulloq taanna, 12.12.12, katikkumasut arlaqartut, aviisimi 24timer-imi, allaaserineqarpoq.
Pingasunngornermi 12.12.12-imi katittoqarsinnaanera, Danmarkimi kommunit arlallit nittartagaanni ussassaarutigineqarpoq.
Nunatsinni palaseqarfinnut marlussunnut paasiniaapallakkatta, paasivarput Nuummi ulloq taannarpiaq katikkusuttut sisamat maannamut nalunaarsimasut, ullup taassuma immikkuullarinnera pissutigalugu. Nuummi palasi, Aviaaja Rohmann, taama ilisimatitsivoq.
Ilulissani Qaqortumilu ulloq taanna katikkusuttunik suli nalunaartoqarsimanngilaq.
- Angumerineqarsinnaavorli. Novembarimmi ulluisa aqqaneq-aappaat nallertinnagu nalunaaraanni ajunngilaq, Nuummi palasi, Aviaaja Rohmann oqarpoq.
Aamma kommunet allaffiinni katittoqarsinnaavoq. Kommuneqarfik Sermersuup pisortaq Søren Hald Møller KNR-mut ilisimatitsivoq maanna Nuummi Rådhusimi ulloq 12.12.12 katinniarlugit nalunaartut aappariit pingasuusut sulilu marlussunnik ilanissaat ilimanartoq.
Qeqqata Kommunia 12.12.12 katinniartunit ataatsinit maanna saaffigineqareersimavoq.
Qaasuitsup Kommuniani Qeqertarsuarmi aamma Qasigiannguani ulloq taanna katinniartunik saaffiginnitoqareersimavoq. Ulloq 12.12.12 katinniartunik Kommune Kujalleq suli saaffigineqarsimanngilaq.
