Ullaakkorsiornissat eqqaamallugu
Angutit 26.902-t peqqissusaat ilisimatuut ukiuni 16-ini malittaralugillu nalilersuiffigisimavaat, misissuinermilu paasisaasa ilagaat, ullaakkorsiunngitsoortartut ullaakkorsiortartunut naleqqiullugit uummalliulernissaminnut 27%-imik qaninnerusartut, nittartagaq Prevention.com taama allappoq.
- Kisitsisit qaffasittupilussuupput, uummalliornerummi toqqutigineqartarnera napparsimalissutigineqartarneralu nalinginnaasutut oqaatigineqarsinnaammat, kikkut tamarmik ullaakkorsiortartuuppata tamanna inuiaqatigiit peqqissusaannut iluaqutaakutsuussagaluarpoq, Leah Cahill, Harvard School of Public Healthimi ilisimatooq oqarpoq.
Ullaakkorsiutinilli nererujussuarnissaq nakerivallaanngikkukku, qaqqortarissanik aamma neriinnarsinnaavutit. Misissuinermi allami, atuagassiami British Journal of Nutritionimi saqqummiunneqartumi, peanutbutteri, peanuttit, mandelillu ullaakkorsiutigisarneri ulloqeqqasiornissap tungaanut aap sukkuata qaffasissusaata allanngujuitsuunissaanut pitsaasumik sunniuteqartarnerat paasineqarsimavoq.
Qaqqortarissat orsumik imaqarluarnerisigut, sivisunerusumik aqajarormiorineqarsinnaapput taamatullu aamma qaarsillaqqanermik sivisunerumik misigititsisinnaallutik, taamaammat aap sukkua allanngorarpallaarneq ajorpoq, ilisimatuut misissuinermik ingerlatsisuusut taama oqarput.
- Peanuttit, qaqqortarissallu pistaciet cashewillu nalinginnaasumik inuussutissartaqarluartuupput, orsumik peqqinnartumik, proteininik, vitamininik mineralinillu inuussutissartalinnik allanik akoqarluarlutik, Kantha Shelke, CorvusBlue LLC-mi inuussutissanik ilisimatusartoq Institute of Food Technologistsimilu oqaaseqartartuusoq taama nassuiaavoq.
