Ulla Tørnæs: Inuit puisinniarsinnaaneri taamatullu puisit amiinik EU-mut tuniniaasinnaaneri attatiinnarneqassaaq
- Amerlanerussuteqartut taama isummernerisa qulakkeertussanngussavaa, puisit amii pillugit peqqussutip sukateriffigineqaqqinnginnissaa, tamnanna EU-p ataatsimeersuarnerani Strassburgimi juulimi pisussami suliarineqarpat.
Taama oqarpoq, Danmarkimi Venstret sinnerlugit EU-p inatsisartuini ilaasortaq taamatullu EU-mi partiit talerperliit sinnerlugit oqaaseqartartoq, Ulla Tørnæs.
- EU-mi ilaasortat tamakkerlutik Strassburgimi juulimi ataatsimeersuarneranni inatsisissatut allannguutip taasissutigitinneqarneranni neriuutigaara, EU-p Iluani Niuffannermut ataatsimiititaliaata amerlanerussuteqarlutik ullumi taasineri, Strassburgimi aamma taamaakkumaartoq.
EU-mi politikeri, Ulla Tørnæs (V) oqarpoq.
Puisit amiisa EU-mi tunisaajunnaarnissaat 2009-mi aalajangerneqarmat, naggueqatigiit Inuit tamassumunnga ilaatinneqannginnissat aalajangiunneqarpoq. Taamalu aalajangiussinerup attatiinnarneqarnissaa, Ulla Tørnæsimut pingaaruteqarsimavoq.
- Aalajangiussinerup tamassuma attatiinnarneqarnissaata saniatiagut piumasarissavara, Inuit puisinniartarnerat pillugu ajortumik paasisitsiniaasarnerit eqqortumik paasisitsiniaasarnernik taarserneqarnissaat, tassami EU-mi innuttat amerlaqisut ajoraluartumik suli isumaqarput, Inuit puisittaasa amii EU-mut suli eqquteqqusaanngitsut. Tassa tamanna allanngortinniagassaq.
EU-p Iluani Niufaanermut ataatsimiititaliaata amerlanerussuteqartut allannguutissamik siunnersuutaat EU-p Kommissioniata, nunat ilaasortaasut taamatullu EU-mi inatsisartut akornanni isumaqatigiinniutaassaaq. Inuilli naggueqatigiinnut tunngasup allanngortinneqarnissaa ilimananngitsoq, EU-p inatsisartuinut Venstret sinnerlugit ilaasortaq, Ulla Tørnæs oqarpoq.