Uldum: Sulinerorusuttut pillarneqassanngillat
Isertitaqqortunerit akileraarnerusalernissaannik Inuit Ataqatigiit siunnersuutaat Demokraatinit isumaqatigineqanngilaq. Siulittaasuat Anda Uldum oqarpoq kommuunit ilaat isertitaqqortunernut ullumikkut akiliinerutitsisartut.
Allattoq Thora H. Nielsen
- Isertitaqqortunerit assersuutigalugu meeqqerivimmiittuuteqarnerminnut akiliinerusareerput, isertitakitsullu akiliinikinnerusarlutik. Aamma friplads-inik taaneqartartunik, tassa akeqanngitsumik meeqqerivinniittuuteqartoqartarpoq, Anda Uldum nassuiaavoq.
Isertitaqqortunerusut akileraarnerusalernissaannik Inuit Ataqatigiit siulittaasuat Sara Olsvig aasaq manna oqallissaaruteqarpoq, tamannali ilalersinnaanngilluinnarlugu Demokraatit siulittaasuat oqarpoq.
- Ilinniarluarsimasut sulerusussusillit pillarniarneqarnerat isumaqatigisinnaanngilluinnarpara, Anda Uldum erseqqissaavoq.