Uldum: Suleqatigiinneq tamanut atuuppoq
Taamatulli isornartorsiunera aningaasaqarnermut aatsitassanullu naalakkersuisup Andreas Uldumip paasiuminaatsippaa.
- Naalakkersuisut suliassaqarfitsik paasisaqarfigissallugu piffissaqartariaqarsimapput, suliniutillu soorlu Aningaasanut Inatsisissap suliarinera aallartisartariaqarsimallugit. Taamaammanuna Naalakkersuisunngortut ulluni 100-ni siullerni eqqissisimatinneqartarnerat ileqquusoq, Andreas Uldum taama allappoq.
- Partiit suleqatiginissaat qilanaarivarput, tassami innuttaasunut, inuiaqatigiinnut inuussutissarsiortunullu iluaqutaasumik aningaasaqarneq pillugu politikkimik qularnaariniarluta amerlanerpaanik isumaqatigiissuteqarnissarput kissaatigaarput, taama naqissuusiivoq.
AAMMA ATUARUK Naalakkersuisut IA-lu attaveqaqatigiinniarnikkut ajornartorsiuteqartut
- Sara Olsvigimullu innersuussutigissavara illuatungiliuttuni partiit annersaasa Naalakkersuisullu suleqatigiilluarsinnaanissaanut siuarsaaqataaqqullugu. Tassami suleqatigiinneq ataqqeqatigiinnerlu tamanut atuuppoq, Naalakkersuisuinnarnuunngitsoq. Ukiuni tulliuttuni Aningaasanut Inatsisissat pillugit IA partiillu allat suleqatiginissaannut qilanaarpunga, isumatusaartumimmi piffissarlu ungasinnerusoq eqqarsaatigalugu politikkikkut aalajangiisoqarnissaa nunatta pisariaqartippaa. Innuttaasut suliffeqarfiillu naatsorsuutigaat tamatsinnut tamatta akisussaaffimmik tigusissasugut, Andreas Uldum naggasiivoq.