Uldum: Qujaukitsup kisitsisit nakkutigisinnaanngilai
Partiit pisortanut akiitsoqalersimappata pisortanit tapiissutisiassaasa ilaasa noqinneqartalernissaat Demokraatit siunnersuutigisimavaat, Demokraatillu naapertorlugit Vittus akissuteqaatimini tapiissutit pillugit kisitsisinik kukkulluinnartunik saqqummiussaqarsimavoq.
Aningaasaqarnermut naalakkersuisup kisitsisinik saqqummiussaani allassimavoq partiinut tapiissutigineqartartunut aallaaviusoq Inatsisartunut ilaasortaatitamut ataatsimut 100.000 koruuninik tapiissuteqartarneq, Anda Uldumilli tamanna ilumuunnginnerarpaa. Aningaasat Vittus Qujaukitsup saqqummiussaanit amerlanerujussuunerarpai.
-Partiit tamarmik tunngaviusumik 650.000 koruuninik tapiissutisisarput tamatuma saniatigut partiit Inatsisartuni ilaasortaatitaqarunik ilaasortamut ataatsimut tapiissutisiarisarpaat 210.000 koruunit. Qujaukitsup kisitsisaataasa piviusunut qanoq assigiinnginnerutiginerat assersuusiorniarlugu taassuma partiia Siumut assersuutigissavara. Siumut Inatsisartuni 15-nik ilaasortaatitaqarpoq. Qujaukitsup saqqummiussai kisitsisit atoraanni taava Siumut tapiissutisisarsimassaaq 1,5 mio. koruuninik ukiumut. Piviusorli tassaavoq Siumut ukiumut tapiissutisisarmat 3,8 mio. koruuninik, Anda Uldum Demokraatineersoq nassuiaavoq.
Demokraatit Vittus sukatereqqullugu kajumissaarpaat siunissamilu akissuteqaasioraangami paasissutissanik eqqortunik saqqummiussisaqqullugu. Tamannami inatsisit naapertorlugit pisussaaffigimmagu.
