Uldum Nunatta karsiani nuannaajallarnartunik takunissamik kissaateqarpoq

Avaleraasartassiissutit pingajorarterutaannaat aalisarneqarput. Taamaakkaluartoq aalisarneq pillugu Sulisitsisut Peqatigiiffianni GE-mi ataatsimiitialiami siulittaasoq naammagisimaarinnippoq avaleraasartoorniarneq iluatsinngikkaluartoq aalisakkanik allanik aalisarnikkut iluatsinneqarumaarmat.

Tunup imartaani avaleraasartuut aalisagartassiissutigineqartut tamakkerneqarsimannginnerat Aningaasaqarnermut Naalakkersuisup ajuusaarnartippaa

- Soorunalimi ajuusaarnarpoq avaleraasartuut tamakkerlugit aalisarneqanngimmata, kisianni tassa silap aamma immap kissassusiata allanngorartarnera ernumanartuuvoq, Aningaasaqarnermut Naalakkersuisoq Andreas Uldum taama oqarpoq.

Aamma atuaruk Illuatungiliuttut: Avaleraasartuut isumalluutigivallaarnagit

Sulisitsisut peqatigiffianni aalisarneq pillugu ataatsimiititaliami siulittaasup, Henrik Lethip avaleraasartuut tamakkerneqanngikkaluartut aalisakkanik allanik aalisarnermut sunniuteqarnavianngitsut oqaatigaa.

- Aalisariutaatillit avaleraasartoorniarnerinnarmik aalisartunut ajortumik sunniuteqarnissaa naatsorsuutiginngilara, soorunalimi avaleraasartuunik amerlanerusunik aalisartoqarsimagaluarpat ajunnginnerusimassagaluarpoq ataatsimulli isigalugu aalisariutaatillit 2015-imi ajunngivissumik angusaqarput, Henrik Leth oqarpoq.

Aamma atuaruk Avaleraasartuunit isertitat ikinneroratarsinnaapput

Avaleraasartuut tamakkiisumik aalisarneqannginnerat aningaasanut inatsimmut ajortumik kinguneqassaaq. Avaleraasartuut ukiormanna aalisarneqartut 30.000 tonsiupput.

Avaleraasartoorniarnermit akitsuutit Nunatta karsianut isertinneqartussatut missingersuutigineqartut pingajorarterutaannaat isertinneqassapput, taakkualu aningaasanut inatsimmut ilanngunneqarnissaat naalakkersuisut pilersaarutigisimagaluarpaat.

Avaleraasartuut 85.000 tonsit aalisarneqarnissaat missingiunneqarput taakkualu Nunatta karsianut 81 million koruuninik isertitsissutaasussaatut missingiunneqarlutik.

Aamma atuaruk Avaleraasartoorniarneq iluatsiffiunngitsoq pakatsissutaasoq

Isertitsissutigineqartussat ikinnerunissaat Nunatta karsianik paarsisumut isumakuluutaanngilaq.

- Kisitsisit kingulliit takoqqaalaariartigit, imaassinnaavoq nuannaajallannartunik kisitsisinik takusugut - taanna missingersuutit misissoqqinneqarnerini paasinarnerulerumaarpoq taamaammat isumalluarnissamut uanga kissaateqarneruvunga isumalluannginnissamiit, taamaammat nalunalaarpoq qanoq inississanersoq, Andreas Uldum oqarpoq.

Aamma atuaruk Steen Lyngep aningaasanut inatsit piviusorsiornerusoq kissaatigaa

Naaja Nathanielsen Inuit Ataqatigiit avaleraasartuunik aalisarnerup siusissukkut unitsinneqarnera aalisarneqartullu ikinnerunerat pillugu Naalakkersuisunut isornartorsiuteqarluni ipassaq oqaaseqarpoq.

- Aningaasanut inatsimmi eqqoriaalluta pisimavugut tamannalu ilikkagaqarfigisariaqarparput, Naaja Nathanielsen KNR-imut ippassaq taama oqarpoq. 

Taanna isumaqarpoq, aningaasanut inatsit 2016-imut atuuttoq misissorneqaqqittartariaqartoq, siusinnerusukkullu siunnersuutigineqartunit piviusorsiornerusunik suliaqartoqartariaqartoq.

Aningaasaqarnermut Naalakkersuisup Andreas Uldumip Nunatta karsiani ajunnginnerusumik piviusorsiornerusumillu sulinissaq neriorsuutigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat