Uldum: Kalaallit Nunaat Grækenlanditut inisseqqajanngilaq

- 2015-imut aningaasanut inatsit saqqummiutingajalerparput, tassanilu 2018-imi missingersuutit oqimaaqatigiissinnissaat siunnerfiussaaq. Ukiormanna annikitsumik amigartooruteqassaagut - tamannali bnp-p 1 proncetia ataatissavaa (EU-p piumasaqataa annerpaamik 3 procentiuvoq).

- Aammattaaq nunatsinni pisortat akiitsui annikittuararsuupput (EU-p piumasaqaataanit, annerpaamik bnp-p 60 procentianit annikinneerarsuulluni).

Allatut oqaatigalugu: Kalaallit Nunaat EU-mut ilaasortaagaluarpat eurozonimullu ilaalluni, taava nunanut maligassiuisutut isigineqassagaluarpoq, aningaasaqarnermut aatsitassanullu naalakkersuisoq aviisimi taama allappoq.

Andreas Uldumip erseqqissaatigaa unammilligassat ilaat tassaammata Pituffimmi kiffartuussinissamik isumaqatigiissummik annaasaqarneq tamatumalu kingunerisaanik millionerpassuarnik annaasaqarnissaq, raajartassiissutit ikiliartortinneqarnerat kiisalu utoqqaat amerliartornerat.

Aamma atuaruk Nunatta aningaasarliornera Folketingimi oqallissutigineqarpoq

Inatsisartut upernaakkut ataatsimiinnissannut siunnersuutissat aningaasaqarnermut nukittorsaataasussat aamma immikkut taavai.

- Sipaarniarnikkuinnaq pisariillisaanikkuinnarlu ineriartornermik pilersitsisoqarsinnaanngilaq. Taamaammat inuussutissarsiutit pingaarnerit, aalisarneq aatsitassarsiornerlu, nukittorsarnissaat sulissutigiinnassavarput. Tamatuma peqatigisaanik takornariartitsinermik inuussutissarsiornerup inerisaavigineqarnissaa ilungersorluta sulissutigaarput, tamanna periarfissarpassuaqarmat.

- Allatut oqaatigalugu: Aningaasaqarnitta Grækenlandimi pisup assinganut inissinnginnissaa Kalaallit Nunaanni naalakkersuisut sapinngisartik tamaat sulissutigaat, aningaasaqarnermut naalakkersuisoq erseqqissaavoq.