NALILIINEQ Uldum: Aningaasanut inatsit kingusinnerusukkut sinneqartooruteqarfiussaaq
Killilersuerusunnginnermik tassalu liberaliusumik politikeqaraluarluni aamma sipaarniuteqarnissanik piviusunngortitsisoqarnissamillu kissaateqarluni nipituuliornikuugaluarluni nammineq sipaaruteqartoqarnissamik akisussaasuulluni allaneruvoq.
Naalakkersuisut, Andreas Uldum nunatta karsianik akisussaasuusoq siuttoralugu, nunatsinni annertunerusumik allanguisoqarnissamik ukioq-manna siunnersuuteqanngillat, nunatta aningaasaqarnera ajortumik inissisimasoq allanngortissallugu.
Sanaartornermut ingerlatsinermullu kontot 76 million koruuninik amigaartoruteqarfiusussatut Naalakkersuisunit siunnersuutigineqarput, tamannali inatsisartut oqallinneranni allangorsinnaavoq.
Annertuunik sipaaruteqartoqarnissaa ukioq manna naatsorsuutigineqanngilaq
Ukiut siulii assigalugit aningaasanut inatsisissatut siunnersuut isumalluarnartoqartinneqarpoq.
Nunatta karsiata aappaagu sinneqartooruteqarnissaa Andreas Uldumip naatsorsuutigaa.
Annertuunik sipaaruteqartoqarnissaa ukioq-manna naatsorsuutigineqanngilaq.
Utoqqaat taamatullu pisortat ikiorsiissutaannik pisartagaqartut sipaarniuteqarnermi eqqugaassanngillat.
Aningaasaqarnermut naalakkersuisunngorlaap qaammatit ikittuinnaat piffissaralugit suliassani pingaarnerpanerpaaq, tassalu aningaasanut inatsisissatut siunnersuut suliaraa.
Siunnersuutigineqartullu amerlanersaat aningaasaqarnermut Naalakkersuisuusimasumit Vittus Qujaukitsumit kingornunneqarput.
Namminersorlutik Oqartussani ukiut tamaasa sipaaruteqartoqartassaaq
Killilersuerusunnginnermik liberaliusumik aningaasaqarnermut Naalakkersuisoq siunnersuuteqarpoq.
Tassami taassuma neriuutigaa Namminersorlutik Oqartussani ukiumut 50 million koruuninik sipaaruteqartoqarsinnaasoq.
Taakkua amerlasuutut isumaqarfigneqarsinnaapput, 50 million koruunit Namminersorlutik Oqartussani atorfillit aamma siunnersortit isumaqatigiissuteqarfigineqartut tamarmik 1 procenterinngikkunikku 2 procenteraat.
Aningaasanut naalakkersuisoqarfimmi pisortaagallartup Peter Hansenip KNR-imut oqaatigaa piviusunngortitsiniarnermi soraarsitsinngikkaluarluni angusaqarluartoqarsinnaasoq taanna oqarpoq.
Sipaaruteqarfissat annertuut innuttaasunut attuumassuteqartut kinguartinneqarput, ilaatigut qinersisoqarsimanera pissutigalugu.