Ulapaarfiugaluartoq neriartortoqanngilaq

Kangerlussuarmi neriniartarfik Roklubben nerisunut 90-inut inissaqarpoq. Naallu maannakkorpiaq ornigarneqarnerpaafigisussaagaluaraa, ataasinguamilluunniit neriartortoqanngilaq.
Allattoq Jens Thorin
juulip 17-at 2012 08:51

Tassami ikaartarfik, takornariat Roklubbimut neriartorlutik ikaagassaat, sermersuup aakkiartupiloorneratigut Akuliarusiarsuup qarsutsisaalerneratigut kuugussaavoq.

Piffissarlu nalaataat ajornerusinnaanngitsoq, Roklubbimi ulluinnarni aqutsisoq, Kim Ernst,  oqaluttuarpoq.

- Sakkortunaarparput. Pisussat qilanaarutigigaluaratsigu. Ulloq taanna angerlaqqusaaffitsinni neriartortut 85-it nerisassiatta pitsaanersaannik neriartornissaminnut qilanaartupilussuugaluarput, Kim Ernst oqarpoq.

Qeqqata Kommuniani sulisut maannakkorpiaq ulappuseruttorput, ikaartarfimmut nunaqarfiup immikkoortuinut marlunnut atassusiisumut, taartaasussamik aaqqiissutissarsiorlutik.

Kisianni ikaartarfiugallartussap piareernissaanut  sapaatit akunneri arlaqarsinaapput.

Utaqqinerlu Kim Ernstimut sakkortuvoq, tassami isertitassaagaluani puiguinnartariaqarpai:

- Aningaasarpaalutsiarsut annaavagut. Maannakkorpiaq qaasiunersut ilisimanngilara, kisianni amerlaqaat. Naak ukiumut qaammatit qulit ammasaraluarluta, juuli aggustilu isertitsiffiginerpaasarpagut, nerisassiatta pitsaanersaat tassani tuniniartaratsigit aammalu takornariartaassuarnut ilaasut, illoqarfinnut allanut ingerlaqqinnginnerminni maaniittut piffissami tassani amerlanerpaasarmata, neriniartarfimmik ingerlatsisoq oqrpoq.

Ikaartarfiugallartussaq qaqugu piareersinnaajumaarnersoq, Qeqqata Kommuniani borgmesterip, Hermann Berthelsenip, ippassaq oqaloqatigisatta oqaatigisinnaangilaa.

Kim Ernstili tunniutiinnarnianngilaq. Takornariat Roklubbiliartissinnangikkunigit, taava namineerluni takkua ornittariaqarpai:

- Maannakkut aaqqissuutigisinnaasarput tassatuaavoq, Hotel Kangerlussuaq ikiorsiullugu aaqqiigallarniarsarigatta, taakkua igaffiat atorlugu grillikkanik tupersuarni sassaalliiisinnaagatta.

Kangerluasuarmi akuliarusiarsuup kuua qaffassimasinnarluni ullup kingulliit appaameqqissimavoq, pissutsillu nakkutigiuminarnerulersimapput.

Aseruatiternerit attaveqarnermut nalakkersuisup, Jens B. Frederiksenip sapaatip akunnerata naanerani alakkarpai, kuussuullu qanittuaniittut sila allanngoriartorneranit aserorneqattaaliorniarlugit, kommuni manna pilersaarusiorpoq.