Uku naalakkersuisunngussasut namminersornermullu naalakkersuisoqarfeqaleqqissasoq

Naalakkersunngortussatut innersuunneqartussat tusagassiortunik katersortitsinermi saqqummiunneqarput - aamma namminersornermut naalakkersuisoqarfeqalissasoq innersuussutigineqassaaq. 

Ineqarnermut attaveqaasersuutinullu naalakkersuisoq, Erik Jensen (Siumut) aamma Naalakkersuisut siulittaasuat, Mute B. Egede (IA), taama oqarput.  

Naalakkersuisunngortussanik innersuussinerit Inatsisartut suli akueringilaat, ullumikkulli akuersissutigineqarnissaat naatsorsuutigineqarpoq.

Naalakkersuisunngortussatut uku innersuussutigineqartut:

Erik Jensen (Siumut), aningaasaqarnermut akileraartarnermullu naalakkersuisoq.

Naaja Nathanielsen (IA), inuussutissarsiornermut, niuernermut, aatsitassanut, inatsisit atuutsinneqarnerannut naligiissitaanermullu naalakkersuisoq.

Vivian Motzfeldt (Siumut), namminersornermut nunanullu allanut naalakkersuisoq.

Aqqaluaq B. Egede (IA), meeqqanut, inuusuttunut, ilinniartitaanermut, kultureqarnermut, timersornermut ilageeqarnermullu naalakkersuisoq.

Kim Kielsen (Siumut), aalisarnermut piniarnermullu naalakkersuisoq.

Agathe Fontain (IA), peqqissutsimut naalakkersuisoq. 

Kalistat Lund (IA), nunalerinermut, imminut pilersornermut, nukissiutinut avatangiisinullu naalakkersuisuuinnassaaq.

Hans Peter Poulsen (Siumut), ineqarnermut attaveqaasersuutinullu naalakkersuisoq. 

Jess Svane (Siumut), suliffeqarnermut, ilaqutariinnut, isumaginninnermut nunamullu namminermut naalakkersuisoq.

Namminersornermut naalakkersuisoqarfeqalernissaa Siumup kissaatigigaa

Namminersornermut naalakkersuisoqarfeqaleqqissasoq, tallimanngormalli tusaamanarsivoq. 

Namminersornermut naalakkersuisoqarfeqaleqqinnissaanik Siumup IA-mut isumaqatiginninniutiginiarlugu siunnersuutigeeraalu IA akuersivoq.

Namminersornermut 2016-imiit 2018-imut naalakkersuisoqarfeqartareerpoq - naalakkersuisoqarfillu taanna Namminersornermut, nunanut allanut nunalerinermullu naalakkersuisoqarfimmik taamani ateqarpoq. 

Naalakkersuisut marluk tallimanngormat tunuartut

Naalakkersuisut marluk Inatsisartut ukiuunerani ataatsimiinnerisa tallimanngormat aallartinneranni tunuarnerisa kingorna Naalakkersuisut nutaamik katitigaapput.

Mimi Karlsen (IA) peqqissutsimut naalakkersuisutut tunuarluni Inatsisartunut siulittaasunngorpoq.

Inatsisartunut siulittaasuusimasup, Kim Kielsenip, Karl Tobiassen aalisarnermut piniarnermullu naalakkersuisutut tunuartoq paarlappaa.

Karl Tobiassen naalakkersuisutut tallimanngormat aamma tunuarpoq. Taanna aalisarnermut inatsisissamik neriorsuutimisut eqquutsitsisinnaasimannginnini peqqutigalugu tunuarpoq.

Naalakkersuisoqarfiit uku marluk paarlagaaffiukkajupput: Peqqissutsimut naalakkersuisoqarfik, Agathe Fontainimi 2021-mi apriilimi qinersinitta kingornali peqqissutsimut naalakkersuisunngortut sisamaraat.

Aamma aalisarnermut naalakkersuisoqarfik, Kim Kielsenimi aamma 2021-mi apriilimi qinersinitta kingornali aalisarnermut naalakkersuisunngortut pingajoraat. 

- Peqqinnissaqarfik unammilligassaqarfigeqaarput, Muté B. Egede tusagassiortunik katersortitsinermi oqarpoq.

- Timikkut, tarnikkut anersaakkullu peqqissuseqarnissatta qulakkeernissaa pisariaqarluinnarpoq. Tassanilu Peqqinnissaqarfik qitiusorujussuarmik inissisimavoq, Peqqinnissaqarfiullu taamaammat aqunneqarnerata nukittorsarneqarnissaa aaqqissuuteqqinneqarnissaa suliassaavoq qinigaaffimmi uuma naajartornerani suliassatta pingaartut ilagisaat.

Aamma aalisarnermut inatsisissaq naammassereersimasassaagaluaq suli piariinngilaq.

- Aalisarnermut inatsisissap naammassinissaa pingaaruteqaqaaq, Muté B. Egede oqarpoq. 

- Upernaartinnagulu naammssinissaa sulissutigineqaleruttorpoq.