Uku iligiit arsaannermi GM-mi semifinalessapput
Angutit inersimasut arsaannermi Ilulissani pissartanngorniunneranni ullumi semifinalertoqassaaq aqagu arfininngornermi inissinniunnerit pilerpata unammersuarnerit naammassissallutik.
Nal. 13.00 K-33 - UB-83
Nal. 15.00 SAK - T-41
Nal. 17.00 G-44 - B-67 (semifinale)
Nal. 19.00 Nagdlúnguak - IT-79 (semifinale)
Semifinalemi siullermi nalunaaqutaq tallimanut aallartittussami unammissapput G-44 Qeqertarsuarmeersoq aamma B-67 Nuummeersoq.
Iligiit taakku marluk ukiut ingerlaneranni pissanganartunik imminnut unammisarput aammalu corona pissutigalugu 2019-miilli pissartanngorniuttoqareersoq maanna pissartanngorniuttoqarnerani erinigineqarsimasumi arsarluartarlutik.
Ukiut qulit matuma siorna G-44 aamma B-67 Sisimiuni finalemi unammipput straffeqattaartoqareersorlu tassani G-44 ajugaavoq, ukioq mannali tassa taakkunani ataasiinnaq finalemut anngussinnaavoq.
B-67ip arsartartui sisamanngornermi aatsaat tamarmiulerput timmisartut kinguaattoornerannit eqqugaallutik tikinnaveeqqareerlutik.
Inisinniunnerit appasinnerusut
Semfinalep aappaani aaqqissuisut Nagdlúnguak Ilulissaneersut aamma IT-79 Nuummeersut unammissapput, tassanilu Nagdlúnguak ajugaassangatinneqarpoq.
Iligiit taakku tamarmik siornatigut pissartaareerput ukioq 2019 Nagdlúnguak kingullermik pissartaavoq IT-79 2017-mi pissartanngorluni illoqarfeqatitik B-67 straffeqattaarnermi ajugaaffigalugit.
Inissinniunnerni appasinnerusuni kikkut unamminissaat pillugu aamma unamminerit marluk pisussaapput ajugaasut normu 5-nngorniutissallutik ajorsartut normu 7-nngorniunneq naammagiinnartariaqassagaat.
K-33 Qaqortumeersoq aamma UB-83 Upernavimmeersoq nalunaaquta 13.00 unammissapput unamminerullu aappaani nalunaaqutaq 15.00 SAK Sisimiuniit aamma T-41 Aasianneesdoq unammissallutik.
Semifinalet tamarmik KNR-TV-mi toqqaannartumik aallakaatinneqassapput.