Kommissionip siulittaasuata Ursula von der Leyenip præsidenti Volodymyr Zelenskyj immersugassaanik tunivaa. EU-mi ilaasortanngorusuttut immersortagaat.Assi: Janis Laizans/Reuters

Ukrainip EU-mut ilaasortanngornissaa sukkaannaq suliariniarneqartoq

Ukrainip EU-mut ilaasortanngorniarneranut suliaq sukkasuumik piareerniarneqarpoq.

Ukrainep EU-mut ilaasortanngornissaanut suli piffissanngoqqajanngikkaluartoq, Ukrainep ilaasortanngornissaanik isumaqatiginninniartoqassanersoq qaammatialuit qaangiuppata aalajangerneqarataannaavoq.

Isummersuisarfimmi Europami pisortaq Lykke Friis, EU-Kommissionimi siulittaasoq Ukrainillu præsidentia ippassaq ataatsimeeqatigereerlugit, taama naliliivoq.

Kommissionip siulittaasuata Ursula von der Leyenip præsidenti Volodymyr Zelenskyj immersugassaanik tunivaa. EU-mi ilaasortanngorusuttut immersortagaat.

Suliap tuaviortumik suliarineqarnissaa Leyenip neriorsuutigaa. Tassalu Ukrainip EU-mi ilaasortanngorumalluni isumaqatiginninniarsinnaanera juunip qaammataani aalajangiiffigineqarataannaalluni.

- Ukrainip qinnuteqaataata sukkasuumik suliarineqarnissaa Ursula von der Leyenip nerioarsuutigaa.

- Suliaq sivikinnerusumik suliarineqassaaq. Nalinginnaasumik ukiup ataatsip missaani suliaasartoq qaammatialunni suliarineqassaaq. EU-mi pisortat juunimi ataatsimeersuartoqarnerani aalajangeeriaannanngorlugit, Lykke Friis oqarpoq.

EU-mi ilaasortanngorusuttoqartillugu suliaq nalinginnaasumik ukiuni arlalinni ingerlasaraluartoq Lykke Friis nassuiaavoq.

Ilaasortanngorumasut isumaqatiginiarneri aallartitsinnagit nunat EU-mi ilaasortat tamarmik isumaqataaqqaarnissaat suliap ukiuni arlalinni ingerlasariaqartarnera pissuteqarpoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl