Ukrainimiut Station Nordimi orsiissapput
Timmisartorsuaq assartuut tassaavoq Illjushin IL-76 MD, qallunaallu sakkutuuinit timmisartortartunit attartorneqarsimalluni.
Tankersuarnik orsiinissaq taaguuteqartinneqarpoq Operation Northern Falcon 2011.
Timmisartorsuaq taanna Ukrainimi sakkutooqarfimmiit Borijspilimiit Kijevip ungasinngisaaniittumit sakkutuunik Ukrainimeersunik issimasoqarluni sapaatiummat aallarpoq.
Timmisartorsuaq ippassaq Aalborg Flyvestationimiippoq, sakkutuut Ukrainimeersut Kalaallit Nunaanni pissutsit pillugit paasissutissinneqaramik. Timmisartoq taanna ullumi Pituffiliartussaavoq.
Sakkutuut Ukrainimeersut katillugit 29-t Operation Northern Falcon 2011-mut peqataassapput.
Orsussaq katillugu 500.000 liiteri Pituffimmiit Station Nordimut nuunneqartussatut pilersaarutigineqarpoq.
Timmisartoq 40.000-it liiterinik usisinnaammat katillugit 13-eriarluni Pituffimmiit Station Nordimut timmisussaassaaq.
Station Nord Qalasersuarmiit 900 kilometerit missaannik ungasitsigisumiippoq, tallimanillu sulisoqarluni. Taakku silasiornermut tunngassuteqartunik suliaqartarput.
Ukrainimiut suleqatigalugit pingajussaa taamatut iliuuseqartoqarpoq. Siullerpaamik taama orsiisoqarmat 2009-mi pivoq, Cossacs On Ice-imik taallugu Station Nordimi tankersuit immerneqaramik.
