Ukrainimiut sikumi

Ukrainemiut illersornissamut ministeriata, ulluni makkunani Danmarkimiittup, danskillu illersornissamut ministeriata, Søren Gade, ukrainemiut Station Nord-imut orsussamik timmisartuussisalernissaat isumaqatigiissutigaat.
septembarip 12-at 2008 16:55

Orsussaq 1 millioni literi timmisartunik 76-eriarlutik Station Nordimut marsip apriilillu qaammataanni assartussavaat.

Station Nord ilisimatuunit najugaqarfigineqartartoq, silap kissakkiartornerata kinguneranik suli amerlanerusunit orninneqartalissammat tamaani orsussamik annertunerusumik peqqumaateqartoqarnissaa pisariaqartinneqarpoq.

Danskit illersornissamut ministeriat, Søren Gade, oqarpoq, isumaqatigiinneq naapertorlugu iliuusissat tamanut iluaqutaassasut. Tassami ukrainemiut akikinnerusumik assartuisinneqarsinnaapput, ukrainemiullu timmisartortartuisa issittumi timmisartornissaminnut sungiusaatigissallugu.

Danmarkip Ukrainellu isumaqatigiissuteqarnerat Ukrainep NATO-mi ilaasortanngornissaanut Danmarkip tapersersuineranut takussutissaavoq. Russilli qanoq iliuuseqassanersut Ukrainemit pissanngatigineqarpoq.

Isumaqatigiissut tuluttut taaguuserneqarsimavoq; Cossacks on Ice.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq