Ukrainep saqitsaassutigineqarnera Issittumi eqqissiviilliuutaasoq

Canada Issittumi Siunnersuisooqatigiit ataatsimiinnerani russinik isornartorsiuiniartoq, Danmarkip issittumi suleqatigiinnermi pisariaqanngitsumik assortuuttoqarnissaa pinngitsoortikkusuppaa.
Assi © : Arnaq Nielsen/KNR
apriilip 24-at 2015 19:24
Nutserisoq Simon Uldum -

Ukioq kisiat nillertuusimanngilaq. Issittumimi politikkikkut suleqatigiinneq anorimit nillertumillusooq aamma sunnerneqarsimavoq. Anori nillertoq Ukrainemit pisoq, Ruslandip nunallu killiit Ukraine pillugu saqitsaassuteqarnerat Issittumi suleqatigiinnermut sunniuteqarpoq.

Issittumi Siunnersuisooqatigit ministeriisa Canadami Iqalunni ukiormanna ataatsimiinnerat politikkikkut ilungersunartorsiortoqarneranik ersersitsiffiuvoq. Ruslandip nunanut allanut tunngasunut ministeriata Sergej Lavrovip nunat killiit killilersuinerat akerleralugu peqataanngilaq tassungalu taarsiullugu Ruslandip avatangiisinut ministerini Sergei Donskoi peqataatitaa.

Aamma atuaruk Russit ministeriata Norge qinngasaaraa

Aamma atuaruk Ilisimasalik: Kalalit Nunaata russit siorasaarutaat siooragissanngilaat

 

Russit peqataatitaqarnerat danskit nuannaarutigaat

Russit ataatsimiinnermut peqataanngitsuuinnannginnerat danskit nunanut allanut tunngasunut ministeriata nuannaarugigaa.

- Ruslandip ministerit ataatsimiinnerannut peqataatitaqanngiinnannginnissamik aalajangernerat oqaloqatoqatiginnikkusussuseqarnerattut nalilerpara, nunanut allanut tunngasunut ministeri Martin Lidegaard Ritzaumut taama oqarpoq.

Russilli Canadamiunit aaqqissuisuusunit oqaaqqissaarneqassallutik naatsorsuutigisinnaavaat. Leona Agklukkammi Ruslandimut oqaaqqissaarissarmaarpoq.

- Canadap Issittumi Siunnersuisooqatigiinni ministerit ataatsimiinnerat iluatsillugu Ruslandip Ukrainemut saassussinera sakkortuumik isornartorsiorniarpaa, Canadap Issittumi Siunnersuisooqatigiinni siulittaasuutitaa. Leona Aglukkaq, qanittukkut taama oqarpoq.

 

Issittup eqqissisimasuunissaa aalajangiusimaannarneqassaaq

Naalagaaffeqatigiilli allarluinnarmik oqariartuutissaqarput. Martin Lidegaardimmi erseqqissaatigaa Issittup politikkikkut assortuuffiunngornissaa sapinngisani tamaat atorlugu pinngitsoortikkumallugu.

Taamaammat aamma oqaatigaa Ruslandip ministerikkoortumik peqataanera iluarisimaarlugu, naak nunanut allanut tunngasunut ministerimik peqataatitsinngikkaluartoq.

- Rusland maannakkorpiaq assigiinngitsutigut isumaqatiginngilarput, Issittorli pillugu suleqatigiinneq ima pingaaruteqartigaat tamakku suleqatigiinnermut tassunga sunniuteqarnissaat pinngitsoortinneqartariaqarluni. Issittumi naalagaaffiit tamatumunnga isumaqataanasoraakka. Kunngeqarfimmut pingaanerpaajugunarpoq Issittup eqqissisimasuunissaa aalajangiusimatiinnarniassallugu, Lidegaard taama oqarpoq