Ukrainemi mumisitsisimasut qulaajaaffigineqarput
Ukrainemi mumisitsisimasut qulaajaaffigineqarnerat suli ingerlavoq. Viktor Jusjenkop mumisitsereerluni naalakkersuinermi siuttunngornerata kingorna ukioq ataaseq qaangiuttorlu mumisitamisut peqquserluuteqarsimatigisoq qulaajarneqarpoq.
Ruslandip Ukrainemut gassimik pilersuinini ukiortaariitsiartoq unitsippaa. Taamanikkut Rusland gassip akitsornissaanik piumasaqarpoq. Kingornalu Tukministanimit Ruslandimillu gassit akuliullugit Ukrainemi atorneqarsinnaasut isumaqatigiissutigineqarpoq. Taamanikkut isumaqatigiittoqarnerani assut eqqumiigineqarpoq naalagaaffiup pigisai namminersortut aqqutigalugit pilersueqqittoqalersinnaaneranik isumaqateqarnera.
Ruslandip Ukrainellu akornanni namminersorluni ikummatissanik tuniniaasartoq annerpaaq Schweizimi angerlarsimaffeqartinneqartuusaarluni Østrigimi immikkoortortaqarfeqartuusaartinneqarpoq. Ruslandimi tusagassiorfiit ullumi nalunaarutigaat tamanna paasisimallugu.
Ukrainemi mumisitsilluni maanna naalakkersuisuni siuttuusoq Viktor Jusjenko ikinngutigilluakkanilu Dimitri Fjerdasilu Ruslandimi najugalik piginneqatigiiffissuarmik taassuminnga piginnittuupput. Dimitri Aasiami ikummatissiorfiit arlallit pisiarissallugit soqutiginnittuuvoq, Ukrainemi TV-qarfiit arlallit pigivai aammalu basketertartut Kiifikkut pigigamigit ilisimaneqaatigilluarpai.
Ukrainemi tusagassiortut qanittukkut misissuinerminni paaseqqammerpaat Viktor aamma Dimitri qanittuararsuullutik imminnut ikinngutigiittut. Taassuma saniatigut eqqumiilluinnartumik USA-mut attuumassuteqarput. Amerikami inatsisinik atortitsinermut ministereqarfimmit misissuisoqarnerani paasineqarpoq Viktor Dimitrilu piginneqatigiillutik ikummatissanik Ukrainemi pilersuisuusut, tamannalu tunngavigalugu sukumiinerusumik misissuisoqarnissaa USA-mit piumasarineqarpoq.
DR-ip tusagassiortua Poul F. Hansen Moskvamit taama oqaluttuarpoq.
