Ukrainemi ippassaq qinersisoqarmat Julia Timosjenko ajugaasutut taaneqarpoq
Ukrainemi ippassaq qinersisoqarnerani Julia Timosjenko ajugaasutut taaneqarpoq, kisitsinerit takutippaat partiia qinerneqarnerpaasimasoq, naligeeqaalli…
Qinersineq qanoq inerneqassanersoq suli nalunaqaaq, nunammi immikkoortortaani arlalinni suli kisitsimmata. Partiit nutartererusuttut nunanullu killernut qaninniarnerusut, soorlu Julia Timosjenkop, præsidentillu Jusjenkop partiivi, qinersinermi kingullermi, Orangemik mumisitsinerup nalaani, Ukrainep qeqqata kitaatalu tungaaneersunit qinerneqarnerupput. Illuatungiliuttoq ullormanna tikillugu naalakkersuisunut siulittaasuusoq, Victor Janukovitj, nunap kangisinnersaani kujasinnersaanilu, russisut oqaaseqarnerusut akornanni qinerneqarnerusaraluarpoq, partiialu taaguuteqarluni, Nunap Immikkoortortaasa Partiiat. Qineqqusaartut nuimanersaasa politikkii assigiinngitsorsuunngikkaluarput, tamarmimmi niuertunut pisoorsuarnut qanittumik atassuteqarput, Janukovitj-illi partiia kangimut suleqatissarsiornerusoq, Julia Timosjenko nutarteriniarnerulluni kitaanut suleqatiserinninneruvoq, siornaalli naalakkersuisunut siulittaasuutsiarnermi nalaani periuutsiminit qasunganerusumik politikkeqarniarluni neriorsuivoq. Ippassarlu qinersinermi naatsorsuutigineqarpoq 10 procentip missaannik siuariassasoq. Taamaalilluni naalakkersuisunngortitseqqissinnaaneq qanillattoraluaraa, partiit mikinerusut arlallit, maanna inatsisartunut isertitseqqarsinnaasut, suleqatigiikkunik qatangiinnartissinnaavaat.
