Ukrainemi atuarfik timmisartunit saassunneqarmat 60-it ajunaarsimassangatinneqarput

Ukrainip kangisinnerusortaani atuarfik timmisartunit saassunneqarmat inuit 60-it ajunaarsimassangatinneqarput, taakkua saassussisoqarnerani atuarfiup ilaanut qimaasimagaluarput.
Atuarfimmi qaartartumeeriffigineqartumi annassimasinnaasunik annaassiniartartut ujaasipput. Assi © : State Emergency Services/Reuters
Allattoq Ritzau
maajip 08-at 2022 13:37

Ukrainep kangisinnerusortaani nunap immikkoortuani Luhanskimi atuarfik timmisartunit arfininngornermi saassunneqarmat, inuit 60-it missaannik amerlatigisut toqutaasimassangatinneqarput.

-- Qaartartumeersoqarnerani atuarfik piuneerullugu aseruatiterneqarpoq.

Qaartartumeerisoqarnerani inuit 90-it atuarfimmiipput.

Taakkunannga 27-it annaanneqarput, guvernøri Serhiy attaveqaatinut sullissivimmi Telegramimi taama allappoq.

- Inuit 60-it missaannik amerlatigisut atuarfimmiipput taakkualu toqusimassangatinneqarput.

Nunap immikkoortuani guvernøri taama oqarpoq.

Ajunaartut saassussinerup nalaani atuarfiup ilaanut allamut qimaasimassangatinneqarput.

Saassussinerup kingorna annaassiniartartut qarmat nakkaanikut akornanni annassimasinnaasunik ujaasisimagaluarput.

Sapaatip ullaassaani anaassiniarnerit suli aallartissimanngillat silaannakkut saassussisoqarsinnaanera ernummatigieqarmat.

Annaassiniarnerit ujaasinerillu sapaammi nanginneqarput.

Ukrainemi nunap immikkoortua Luhansk sanilialu Donetsk Ukrainep kangisissuaniittut Ukrainemit avissaarniartuupput.

Nunap immikkoortui taakkua namminersortutut, Ruslandip præsidentianit Vladimir Putinimit , sorsunneq aallartinngilaartoq februaarip ulluisa 24-anni nalunaarutigineqarput