Ukrainemi ajornartorsiortoqarnera pillugu Arctic Winter Gamesimit Yamal mattunneqarpoq
Arctic Winter Gamesimi ikumatitaq aappaagu januarip naanerani Canadap ilaani Albertami ikinneqarmat Ruslandimeersunik peqataasoqassanngilaq. Tamanna Ruslandip Ukrainemik tiguaaniarnerata toqqaannartumik kingunerivaa.
Arctic Winter Gamesimi nunanit tamalaani ataatsimiititaliaq Arctic Winter Gamesimi oqartussaat qullersarisaat marlunngornermi unnukkut taama nalunaarpoq.
- Ukrainemi maanna pisut inuit inuunerannut sakkortuumik kinguneqartut Arctic Winter Gamesip nunani tamalaani ataatsimiititaliaata ernumanarluinnartutut isigivai, Arctic Winter Gamesip nunani tamalaani ataatsimiititaliaani siulittaasoq John Flynn nalunaarpoq.
Arctic Winter Gamesimeersut nunani tamalaani timersornermut kattuffissuit Ukrainemi sorsunnermut qisuariaataat malittareqqissaarpaat. Timersuutini tamalaani russit timersortartui maanna peqataasinnaatitaajunnaarput.
Timersortartut 2.000-it missaanniittut aappaagu Albertami illoqarfimmi Wood Buffalomi katersuutissapput tassanilu Nunarput aamma peqataatitaqartussaavoq.
Nunani tamalaani timersortartut kattuffiisa russinut mattussinerminut atatillugu kaammattuutigaat Ukrainemi maanna pisut eqqissisimasumik iluarsinneqarnissaat.
- Nunani tamalaani suleqatigisatta eqqissinermut kaammattuutaat ilalerparput, John Flynn oqarpoq.
Sisoraaserlutik ooqattaasartartut Ukaleq aamma Sondre Slettemark timersornerup silarsuanit Ukrainemi pisut qisuariarfigineqarnerat sapaatip akunnera kingulleq inuusuttut nunarsuarmi pissartanngorniunneranni qanimut malugaat.
Sisoraaserluni ooqattaasartartut nunani tamalaani kattuffiat IBU aalajangerpoq russit aamma Hvideruslandimip erfalasui inuusuttut nunarsuarmi pissartanngorniunneranni atorneqassanngitsut russit Ukrainemik tiguaaniarnerannut qisuariaatitut.
Russit sisoraaserlutik ooqattaasartartut aamma inuiaassutsimik atisaminni nittarsaasseqqusaanngilaat aammalu taakku arlaat ajugaassagaluarpat russit inuiattut erinarsuutaat atorneqarsinnaatitaanani.