Ukraine: Russit qullartaasiaannik marserutinik Kyivip nalaani nakkaatitsivugut

Qullartaasiat arfinillit Ruslandimeersut, Ukrainep illoqarfiisa pingaarnersaannik Kyivimik qulaavaasut takuneqarput, Ukrainellu sakkutuuisa timmisartortartut qullartaasiat arlallit nakkartippaat.

Nutaarsiassaqartitsivik AFP taama allaaserisaqarpoq.

Qullartaasiat arfinillit Ukrainep sakkutuuinit timmisartortartunit ullup ingerlanerani takuneqarput, amerlanerillu maanna nakkartinneqarlutik. Kyivimi oqartussat taama oqarput.

Qullartaasiat pineqartut alapernaarsuinermut atortoqartut maanna nalunaarutigineqarpoq, qullartaasiallu Ukrainep sakkutuuinik timmisartortartunik alapernaarsuinissaannut atorneqeqartussatut naatsorsuussaasut oqaatigineqarpoq.

Qullartaasiat takuneqarmata siggartaatit kalerrisaarutit pingasunngornermi kalerrisaarilerput. Qaartartut igeriuttakkat atorlugit saassussisoqaleraangat kalerrisaarutit atorneqartaraluarput.

Ukraine Ruslandimit siorna februaarip ulluisa 24-anni saassunneqarpoq.

Russit qullartaasiaat Ukrainemi sorsuttoqarnerata nalaani Ukrainep silaannartaani arlaleriarlutik takuneqarput.

Ukrainep saniliata Moldovap silaannartaa Moldovami oqartussanit marlunngornermi sivikitsumik matuneqaraluarpoq, qullartaasiaasorineqartormi tassani takuneqarami. Rusland Moldovami naalakkersuisut uppisinneqarnissaannut pilersaarusiortoq Moldovami naalakkersuisunit siusinnerusukkut pasilliutigineqarpoq.

Qullartaasiat qulaavaasullu suussusersineqanngitsut allat USA-mi sapaatit-akunnerit kingulliit oqallisaangaatsiarput. USA-mi oqartussat Kinamiut qullartaasiaannik nakkutiginninnertik, USA-p illersornissamut ministereqarfiata februaarip ulluisa aappaanni nalunaarutigaaa.

Qullartaasiaq USA-p silaannartaaniiittoq alapernaarsuinermut atorneqartoq USA-p oqaatigaa, qullartaasiarlu USA-p sakkutuuinit timmisartortartunit februaarip ulluisa sisamaanni nakkartinneqarluni.

Qulaavaasut suussusersineqanngitsut allat USA-mit kingorna aamma nakkartinneqarput.