Ukraine-mi kipusooraluttuinnarput

Allattoq Mads Lynge
maajip 25-at 2007 15:45

Ukrainemi politikikkut kipusoorneq kipusooraluttuinnarfiuvoq, præsidenti Viktor Jusjtjenko-p Ukrainimi nunap iluani pissutsinut ministeriusoq ullumi peersimmagu, namminerlu politiinik nakkutiginninneq aqutarilerlugu.

Taamatut pissusilersorneq russinik illersuisuusumit ministeriunermit, Viktor Janukovitjimit iluarineqanngilluinnarpoq. Præsidentip politiinik aqutsilernissaanik inassuteqarnerani Jusjtjenko kinguninnguatigut aalajangiivoq unnerluussisoq, Svjatoslav Piskun soraarsitaassasoq, pissutigalugu, pisortaqarfimmi unnerluussisuusinnaanngitsoq inatsisartuni inatsisiliortuujutigaluni.

- Naalakkersuisut isumasioqqaarnagit taamatut soraarsitsisimaneq akuerineqarsinnanngilaq. Taamaaliornerlu pissutsinik ajornerulersiinnassasoq isumaqarpunga, ministeriuneq Janukovitj, naalakkersuisut ataatsimiinneranni oqarpoq.

Soraarsitsisimaneq naalagaaffiup inatsisaanut naapertuutinngitsoq oqaatigaa, taamatullu akerliliine-rata malitsigisaanik nuannarinnittai Kijev-imi akerliussutsimik takutitsiniarlutik katersuuteruttulerput.

Nunap iluani pissutsinut ministerip akissutaa tassaavoq politiinik unnerluussisup allaffeqarfianik paarsisulersuisitsigami.

Nunap iluanut pissutsinut ministerip Vasil Tsusjko-p, politiit peqatigalugit ungaluit qarsullugit unnerluussisup allaffeqarfianut isertertoq Ukrainimiut TV-annit takutinneqarpoq.