Ukkusissarmiut Dronningikkunnit tikeraarneqarput

Nunaqarfimmi aqutsisunut ilaasortaq, Paninnguaq Petersen dronningikkunnik tikilluaqqusisuussaaq, Ukkusissarmiullu Ataqqinartorsuarmit tikeraartoqarnissaminnut qilanaartut malunnartoq taassuma oqaluttuaraa.

- Ippassaq ulloq kingulleq piareersaatigut naammassiartuaartillugit inuit kiinaat nuannaartorujuupput qiimasorujuullutillu, aqagumut tassa ullumimut tikittoqartussaanertik pillugu, Paninnguaq Petersen oqaluttuarpoq.

Dronningimit tikeraartoqarnissamaaleramilli aqqusernginik saliinerit kusassaanerillu aallartissimasut, Paninnguaq Petersenip oqaatigaa.

Ukkusissarmiuaqqat marluk, nukappiaqqap niviarsiaqqallu arfineq marlunnik arfineq pingasunillu ukiullit Dronning Margrethe naasunik tunissamaarpaat.

Kaffisoqatigiinneq aliikkusersuinertalik

Dronningikkullu nunaqarfimmiinnerini tupersuup toqqaviani, tassa ukkusissarmiut inuiattut ullorsiorfimmi katerittarfianni, kaffisoqatigiittoqassaaq. Tassanilu inersimasut meeqqallu kalattoornermik takutitsissapput.

Dronninng uialu Nunaqarfimmi alakkagassaqarluartut, Paninnguaq Petersen oqaluttuarpoq.

- Siullermik niugunik qummut ingerlanerminni nakorsiartarfik pulaassuaat, taava oqaluffimmukassapput, oqaluffimmeerteerunillu utoqqaanersarput Salomine Skade pulaassuaat, taava atuarfimmukassapput tupersuup toqqavikorsuanukassapput. Tassaneereerunillu aallannginnerminnilu quersuarmut aqqusaassallutik, Ukkusissani nunaqarfimmi aqutsisunut  ilaasortaq, Paninnguaq Petersen oqarpoq.

Kunngikkormiut umiarsuaat Dannebrog Ukkusissaniit nalunaaqutaq tallimanut aallassaaq, aamarsuarsiorfiusimasup  Qullissat  tungaanut ingerlaassalluni. Dronning Margrethe uialu Prins Henrik, Qullissanut aqagu ullaakkut qulinut qiteqquppat tikissapput.