Ukkusissani pissutsit ajorluinnarput

Royal Greenlandip Ukkusissani tunisassiorfiani pissutsit ima ilungersunartigilerput, najukkami aalisartut piniartullu peqatigiiffiata Karl Amossenip tusagassiorfiit aqqutigalugit ikioqqusariaqarluni. Tunisassiorfiup pisortaa isornartorsiorneqarpoq aammalu Royal Greenlandilu ilatsiinnartutut isornartorsiorneqarluni.
Allattoq Peter Troelsen, Simon Uldum
juunip 28-at 2013 08:11

Tunisassiorneq ukiormanna aallartimmalli arlaleriaqarluni ingerlasinnaajunnaartarpoq, tunisassiorfiullu pisortaa ima maanna pissaaneqalertigaat, kikkut tunisassiorfimmut tuniseqqusaanersut aalajangersornialerlugu.

- Tamanna kusanaalluinnarpoq inuttarsiunertullu taasariaqarluni. Maannami imaalerpoq aalisartup qaqugu tunisinissani naluaa sianerfigineqarunilu aatsaat paasisinnaallugu qaqugu tunisissanerluni. Pissutsit tamakku naammanginanngilluinnarput taamaattumik pissutsit aaqqinniarlungit isumaqarpugut RG-p qullersaqarfia akuliuttariaqartoq, Karl Amossen oqarpoq.

Ukkusissani pissutsit qanikkut iluarsiivigineqanngippata, najukkami aalisartut piniartullu peqatigiiffiata siulittaasuata neriuutigaa Aalisarnermut Naalakkersuisoqarfik akuliussinnaassasoq.

- Taamatuinnarmi ingerlasoqarsinnaanngilaq. Ukiorpassuanngorput maani aalisartut taama atugaqarluta taamaaginnartoqarsinnaanngimmallu aaqqiisoqarnissaa piaartumik piumasaraarput, Karl Amossen isumaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq