Ukiuunerani nalunaaqutaq nikisinneqassasoq eqqaamallugu
Aqagu ullaakkut sininnerusinnaavutit nalunaaquttap akunneranik ataatsimik, taamaaliorsinnaavut eqqaamagukku unnugu nalunaaquttap kinguartinneqarnissaa.
Allattoq Apollo Jeremiassen
Ukiuliinnaqaaq-aasiit. Taamaammat ileqqorilersimasatsitut nalunaaqutaq akunnermik ataatsimik unnugu kinguartittussanngorparput.
Kitaani, Tasiilami Qaanaamilu unnugu nalunaaqutaq aqqanermut akunnermik ataatsimik kinguartissavarput, taamaalilluni nalunaaqutaq unnukkut qulinngortillugu.
Ittoqqortoormiuni nalunaaqutaq unnuaqeqqata kingorna, tassa nalunaaqutaq ataatsimut akunnermik ataatsimik kinguartissaaq, taamaalilluni nalunaaqutaq unnuap qeqqartillugu.
Pituffimmi Danmarkshavnimilu nalunaaquttat aasaanerani allanngortinneqarneq ajormata sumiiffinni pineqartuni nikisitsisoqanngilaq.