Ukiutoqqami qummoroortaatit ajutoorutiginaveersaakkit

Qummoroortartut kusarnartut nuannersullu mianersuunneqarnissaat ukiuni kingullerni pikkoriffiginerulersimagaluarlutigit, taamaattoq ajutoornerit pisariaqanngikkaluartut suli naammattuugassaasut, Dronning Ingridip Napparsimmavissuani Nuummiittumi nakorsap, Jesper Olesenip oqaatigaa.

- Qmmoroortartornerup kinguneranik sianiilliornerullu kinguneranik ajutoornerit pisariaqanngikkaluartut nakorsiartarfimmi suli naammattoortarpagut, nakorsaq Jesper Olesen oqarpoq.

Inuit atisagissaartut uutitersimasullu, nakorsiartarfimmi juullip ukiortaallu akornanni takornartaanngitsut, Jesper Olesenip oqaatigaa. Ajutoornerilliuku suut qanorlu pisartut? Apeqqummut taassumunnga nakorsaq, Jesper Olesen ima akivoq.

- Inuit ilaasa nuannarisarpaat, qummoroortartut tigummiinnarlugit aallartinnissaat. Taamaaliornermi qummoroortartup seersui uunartut assammut torartarput, qummullu aallalernerani seersut sakkortunerusarmata uutitserujussuarsinnaallutik.

Jesper Olesen oqarpoq, uutiternerullu kinguneranik qanoq tamanna kinguneqarsinnaasoq ima oqaatigalugu.

- Qummoroortartut ilaat ima sakkortutigisinnaapput allaat assak inussallu ajoquserujussuarneqarsinnaallutik, ilaannilumi inussat ilaat annaaneqarsinnaallutik, Jesper Olesen oqarpoq.

Qummoroortartunik pinnguarnissarput ukiuni kingullerni mianersuunnerulersimagaluarlutigu, suli ajutoorujussuartoqartartoq, Jesper Olesenip oqaatigaa.

- Qummoroortartut qanoq atorneqarnissaannik aamma isarussanik illersuutaasinnaasunik atuisarnissatsinnik, ukiuni kingullerni paasititsiniaanerit iluaqutaasimasut malunnarpoq. Tamatumalu kinguneraa isitigut ajutoornerit ikinnerulersimanerinut, nakorsaq Jesper Olesen oqarpoq.

Qummoroortartumik isit eqqorneqarpata, tamanna tappigernermik kinguneqarsinnaasoq, nakorsap oqaatigaa.

- Isit qummoroortartumik eqqorneqarpata nakorsarneqarsinnaaneq ajorput. Qaartoornerup kinguneranik qummoroortartup ilamerngi isip iluanut pisarput, tamatumalu kingunerisarpaa tappigerneq.

Jesper Olesen oqarpoq, isillu illersorneqarnissaat siunnersuutigalugu.

- Qummoroortartut inunnit mianersorfigineqarnerulersimapput, isarussanik illersuutinik atuinerulersimallutik. Aamma qummoroortartut aallanngitsoortut orninneqannginnissaat ilikkarsimallutigu.

Dronning Ingridip Napparsimmavissuani nakorsaq, Jesper Olesen taama oqarpoq.