Ukiutoqqami arpanneq iluatsilluartoq

Ukiutoqqami arpanneq Narsami 50-it missaannit peqataaffigineqarpoq. Nuummi aamma ukiutoqqami arpattoqarpoq.
Allattoq Noah Mølgaard
januaarip 03-at 2012 08:32

Angusat allattornissaat uatseerallarlugu ukiutoqqami arpannerit ingerlanneqarput. Ileqqoq taanna ukiorpaalunni Nuummi ingerlanneqartareersoq Narsami pingajussaa ingerlanneqarpoq tamannalu iluatsilluarpoq.

- Ukioq manna peqataasut amerlatseriaqqiinnarsimallutik 50-it tungaannut naalungiarsunniit utoqqarnut qiimaqalutik takkussuupput. Arpannermi peqataaneq tassaavoq peqqissuunermik ersersitsineq, aammalu ukiumut nutaamut peqqissumik siunertaqarluni inuuneqarnissamik oqariartuuteqarneq, Narsami aaqqissuisuniit Katti Frederiksen nalunaarpoq.

Ukiutoqqami arpannermi Narsmiut 2,5 kilometerimut aamma 5 kilometerimut arpanneq pisuttuarnerluunniit toqqarsinnaavaat. Arpannerup kingorna makitsinikkut assigiinngitsunik pinnatassiisoqarpoq.

Nuummi ukiutoqqami arpaqataasut 15-it 20-illu akornanniipput taakkulu 3,5 kilometerimut arpapput. Tassani aamma angusat eqqarsaatigivallaarnagit arpattoqarpoq, periarfissarlu taanna iluatsillugu arpattartut imminnut ukiumut qaangiuttumut qujaffigeqatigiillutillu nutaassamut iserluarnissamik kissaateqatigiipput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk