Spaniami nunap eqqartuussiiviata baskerini sakkutuuni immikkoorniani ETA-mi ilaasortat pingasut, Madridimi 2006-imi decembarimi biilit uninngaartarfianni biilinit qaartartumik usisunit saassussisimanerannut, tamaasa ukiuni 1040-ni parnaarussassanngorlugit eqqartuuppai.
Saassussineq Ecuadorimiut nunasisut marluk toqutaanerannik allallu 40-t aqqunartiternerannik kinguneqartoq spaniamiut ETA-llu akornanni eqqissineqarnissaanik suliap ajalusoorneranik kinguneqarpoq.
Mattin Sarasola, Mikel San Sebastian aama Igor Portu aammattaaq katillugit 1,2 mio. euronik (tassa 8,9 mio. kr.-inik) akiliisussanngorlugit eqqartuunneqarput, ecuadorimiut taakkua toqutaasut ilaqutaannut taarsiissutissanik.
Taakkua pingasut unnerluussisussaatitaasunit tamarmik ukiuni 1.120-ni parnaarunneqarnissaat piumasarineqaraluarpoq.
ETA-p Baskerit nunaata namminersortunngortinniarnera pillugu 1968-imili sakkortuunik iliuuseqartarnermigut inuit 820-t sinnerlugit toquppai. Suleqatigiit USA-mi EU-milu peqqarniisaarniartartut allassimaffiini nalunaarsorsimapput.