Ukiut sisamat siumukarfiusut
Demokraatit IA aamma KP anguniakkatigut qanitariippallaanngikkaluarlutik, naalakkersuisooqatigiileqqaarmata sivisunavianngitsutut ilaatigut siulittuutigineqartaraluarpoq. Taamaattorli qinigaaffiup naanissaa tikillugu nakimanatik naalakkersuisooqatigiipput.
- Naalakkersuisooqatigiileqqaaratta aningaasaqarniarneq erfattoq siumut saatinniarlugu siuliniuteqaqqaarpugut. Naalakkersuisooqatigiilerattami Kuupik siuttuulluni aatsaat aqutsisussanngorpoq, uagullu nunatsinni aqutseqataasussatut misilittagaqarata mianersortumilli aallartisaqataavugut. Maannalu nunatta karsia aningaasatigut aalaakkaasunngoreerpoq, nunattalu siunissamut pitsaanerusumut siumukarnissaa tullinnguuppoq, Palle Christiansen knr.gl-mit apersorneqarluni oqarpoq.
Naak Kattusseqatigiit Partiiat qinersinermi matumani unammilligassarpassuaqaraluartoq, kingullermituulli qinersisoqassagaluarpat taava naalakkersuisooqatigiit amerlanerussuteqaqqeriaannaapput. Palle Christiansenilu Demokraatit sinnerlugit qingaaqqissagaluaruni politikkikkut suleqatigiinnissamut aammaaqqikkumavoq.
- Naalakkersuisooqatigiinnitsinni ataqqeqatigiissumik suliarpassuaqarpugut suleqatigiilluarsimallutalu. Naak tamatta qineqqusaarutivut assigiinngikkaluartut naalakkersuisooqatigeeqqinnissamut piareeqqavugut. Assoroornartoqarsimaqaaq nunattali iluaqutissarsiniarneranut taamaattariaqarsimavoq. Suminngaanneerneq apeqqutaatinnagu nunatsinni suli aamma pitsaanerusumik suleqataarusuppugut, ineriartortoqaqqissappammi tamatta immitsinnut atorfissaqartippugut, Palle Christiansen.
